24.06.2026 | 21:44
Հայաստանի մի շարք հասցեներում էլեկտրաէներգիայի անջատումներ կլինեն
Լեհաստանում սև շուկայում երիկամներ վաճառած ուկրաինուհու են ձերբակալել․ Հայաստանից ևս տուժողներ կան
Քաղաքականություն
11.03.2025 | 18:00
Լեհ սահմանապահները ձերբակալել են մի ուկրաինուհու, որը Ղազախստանում դատապարտվել է 12 տարվա ազատազրկման՝ մարդկային օրգանների առևտրով զբաղվող հանցախմբում մասնակցության և 56 երիկամի վաճառքի համար, հաղորդում է Reuters-ը։
35-ամյա կինը, որը նույնականացվել է Քսենիա Պ., ձերբակալվել է Լեհաստանի և Ուկրաինայի միջև երկաթուղային անցումում՝ Ինտերպոլի կարմիր ծանուցմամբ, ասվում է Պրժեմիսլի դատախազության խոսնակ Մարտա Պյետկովսկայայի հայտարարության մեջ:
Դատախազները չեն հայտնել, թե ինչու կինը դատապարտվելուց հետո Ղազախստանի բանտում չի եղել: Նա հետախուզվում էր Ինտերպոլի կողմից 2020 թվականի նոյեմբերից։ Կինը դատապարտվել է միջազգային կազմակերպված հանցավոր խմբին մասնակցելու համար, որը 2017-ից 2019 թվականներին ապօրինի կերպով մարդկանցից հյուսվածքներ և օրգաններ է հավաքել և դրանք վաճառել սև շուկայում։
Կինը մեղավոր է ճանաչվել նաև «Ղազախստանում, Հայաստանում, Ադրբեջանում, Ուկրաինայում, Ղրղզստանում, Տաջիկստանում, Ուզբեկստանում և Թաիլանդում 56 տուժողների երիկամներ» անօրինական կերպով ձեռք բերելու և «կատարված հանցագործությունները եկամտի մշտական աղբյուրի վերածելու» համար։
Դատախազությունը միջնորդություն է ներկայացրել դատարան՝ նրա նկատմամբ որպես խափանման միջոց կիրառելու կալանքը մեկ շաբաթ ժամկետով՝ Ղազախստանին արտահանձնելու նպատակով։
Թարգմանությունը՝ Էմմա Չոբանյանի
