27.03.2025 | 00:25
Հայ շախմատիստները նվաճել են շախմատի Աշխարհի գավաթի ուղեգրեր
Հովհաննես Ավետիսյանի նկատմամբ քրեական հետապնդումը դադարեցվել է
Հասարակություն
11.03.2025 | 12:33
Կառավարման մասնագետ Հովհաննես Ավետիսյանի նկատմամբ քրեական հետապնդումը դադարեցվել է մեղսագրվող արարքը չկատարելու հիմնավորմամբ։ Այս մասին Ավետիսյանը գրառում է արել ֆեյսբուքյան իր էջում՝ կից լուսանկարներ հրապարակելով, որտեղ համապատասխան որոշումն ու Ավետիսյանից առգրավված զենք-զինամթերքն են։
«Քանի որ ի սկզբանե կեղծ գործ էր, այսպես էլ պետք է լիներ, կամ էլ մյուս տարբերակը պետք է լիներ՝ բերեին, գրպանս ապօրինի զենք դնեին, իրենց գործը առաջ տանեին»,- Factor.am-ի հետ զրույցում ասաց Ավետիսյանը։
Նրա խոսքով՝ քրեական հետապնդման պատճառով մասնագիտական հանրությունը և միջազգային կառույցներն իր հետ համագործակցությունից խուսափում են։
«Այս ամենը դիտավորյալ են անում, ուզում են քո հեղինակության հետ խաղան։ Ուղղակի քաղաքական հետապնդում է, իրենք թիրախավորված դիտավորյալ անում են, նպատակն այն չէ, որ կալանավորի, մեկուսացնի, այլ քեզ փչացնի ու վախեցնի, որ դադարես ընդդիմանալ»,- ասում է Հովհաննես Ավետիսյանը։
Հիշեցնենք՝ Ավետիսյանին հոկտեմբերի 31-ին ձերբակալել էին ապօրինի զենք պահելու կասկածանքով, և քանի որ խուզարկություններից հետո նրա մոտ չէին հայտնաբերել ապօրինի զենք, ազատ էին արձակել։ Այդ պահից սկսած՝ Ավետիսյանին պատկանող մեքենան և իրերը Քննչական կոմիտեն չէր վերադարձնում, իսկ քրեական վարույթի քննությունը շարունակվում էր։
Ավելի վաղ քննիչը Ավետիսյանի մեքենան վերադարձել էր, սակայն զենք-զինամթերքը շարունակում էր մնալ իրավապահ կառույցի մոտ։
Անի Թամրազյան
