14.09.2026 | 23:23
Պապիկյանի գլխավորած պատվիրակությունն աշխատանքային այցով մեկնել է Չինաստան
Ում բարեվարքությունն է ԿԿՀ-ն բացասական գնահատել․ Հակակոռուպցիոն կոմիտեի նախագահի թեկնածուների ընտրությունը կկայանա երկուշաբթի
Հասարակություն
07.03.2025 | 17:25
Ինչպես այսօր տեղեկացրել էինք, երկուշաբթի օրը՝ մարտի 10-ին, կանցկացվի երկրորդ մրցույթը Հակակոռուպցիոն կոմիտեի նախագահի թեկնածուների միջև։ Հինգ թեկնածուներից երկու Կոռուպցիայի կանխարգելման հանձնաժողովի կողմից բարեվարքության բացասական եզրակացություն են ստացել։
Factor․am-ին հաջողվեց տեղեկանալ, թե ովքեր են այդ թեկնածուները։ Մեր հավաստի տեղեկություններով՝ Հակակոռուպցիոն կոմիտեի քննչական երրորդ վարչության հատկապես կարևոր գործերով ավագ քննիչ Արտաշես Մաիլյանի և փաստաբան Կարեն Բատիկյանի բարեվարքությունն է բացասական գնահատվել ԿԿՀ-ի կողմից։ Թե որ չափանիշները չեն բավարարել Հանձնաժողովին, խիստ գաղտնի է պահվում։ Այնուամենայնիվ, չնայած դրան, բոլոր 5 թեկնածուներն էլ երկուշաբթի օրը կմասնակցեն մրցույթին։
Մյուս երեք թեկնածուները՝ վարչապետի աշխատակազմի տեսչական մարմինների աշխատանքների համակարգման գրասենյակի ղեկավար Պետրոս Մարտիրոսյանի, Քննչական կոմիտեի նախագահի տեղակալ Արթուր Նահապետյանի և ապօրինի ծագում ունեցող գույքի բռնագանձման գործերով վարչության ավագ դատախազ Գևորգ Քոչարյանի բարեվարքությունը Կոռուպցիայի կանխարգելման հանձնաժողովը դրական է գնահատել։
Ռոզա Վարդանյան
