03.04.2026 | 17:02
Մենք իշխանություն ենք փոխել, որ տենց խոսացողներ չլինեն․ ուզում եք մեր վրայով քայլե՞ք Երևանի բնակիչ․ ՏԵՍԱՆՅՈՒԹ
ԱՄԷ-ի՝ ԵՏՄ-ին անդամակցության հարց այս պահին չկա․ Էկոնոմիկայի նախարարություն
Քաղաքականություն
07.03.2025 | 12:21
Ներկայումս ԵՏՄ-ին Արաբական Միացյալ Էմիրությունների անդամակցության հարց չկա, այս մասին Factor.am-ի գրավոր հարցմանն ի պատասխան պարզաբանել են Էկոնոմիկայի նախարարությունից՝ անդրադառնալով Եվրասիական տնտեսական հանձնաժողովի առևտրի նախարար Անդրեյ Սլեպնևի հայտարարությանը, թե ԱՄԷ-ի և ԵՏՄ-ի միջև համաձայնագրի նախապատրաստման շուրջ բանակցություններն ավարտվել են։ Իսկ ավելի վաղ ԱՄԷ-ի արտաքին առևտրի պետնախարարն էր տեղեկացրել, որ երկու-երեք ամսից համաձայնագիր կկնքեն ազատ առևտրի գոտի ստեղծելու մասին։
«Ըստ էության, Անդրեյ Սլեպնևի հայտարարությունը եղել է ԱՄԷ-ԵՏՄ արտոնյալ բանակցությունների մասին, որի ուղղությամբ Եվրասիական տնտեսական հանձնաժողովը՝ ԵՏՄ անդամ երկրների և ԱՄԷ-ի հետ համատեղ աշխատանքներ է իրականացնում։ Հարկ է նշել, որ ազատ առևտրի համաձայնագրերի կնքման ուղղությամբ նմանօրինակ բանակցություններ ներկայումս վարվում են նաև Ինդոնեզիայի, Մոնղոլիայի, ինչպես նաև՝ Եգիպտոսի հետ։ ԵՏՄ շրջանակներում արդեն իսկ կնքված ազատ առևտրի համաձայնագրեր առկա են ԻԻՀ, Սինգապուրի, Սերբիայի և Վիետնամի հետ»,- ասված է նախարարության պատասխանում։
Գերատեսչությունից նաև նշել են, որ ԱՄԷ-ն հանդիսանում է Հայաստանի առևտրային գործընկեր, զբաղեցնելով նախորդ տարվա արդյունքներով երկրորդ տեղը Ռուսաստանի Դաշնությունից հետո։ Նախարարության փոխանցմամբ՝ ԱՄԷ-ի հետ առևտրաշրջանառությունը նախորդ տարի 2023 թվականի հետ համեմատ աճել է 2, 3 անգամ՝ կազմելով 5,3 մլրդ դոլար։
«Ինչ վերաբերում է ԵՏՄ-ԱՄԷ համաձայնագրին, վերջինիս կնքման արդյունքում ԵՏՄ անդամ պետությունները ստանում են մուտքի արտոնյալ պայմաններ ապրանքային անվանացանկի 86 %-ի չափով, որի արտահանման ծածկույթը դեպի Արաբական Միացյալ Էմիրություններ Եվրասիական տնտեսական միության համար կազմում է 98 %»,-հայտնել են գերատեսչությունից՝ շեշտելով, որ ՀՀ-ից դեպի ԱՄԷ արտոնյալ պայմաններով արտահանման ծածկույթը կկազմի ընթացիկ արտահանման 95 %-ը։
Մանյա Պողոսյան
