18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Ծխախոտի վաճառքի արգելքը 18-ի փոխարեն սահմանել 21 տարեկան․ ինչպես կազդի Հակոբ Արշակյանի առաջարկը բանակում ծխախոտի օգտագործման վրա. ՏԵՍԱՆՅՈՒԹ
Հասարակություն
07.03.2025 | 16:06
ԱԺ փոխնախագահ Հակոբ Արշակյանն այսօր իր ֆեյբուքյան ուղիղ եթերում առաջարկել է ծխախոտի վաճառքի տարիքը 18-ի փոխարեն դարձնել 21 տարեկան։ Խորհրդարանի փոխխոսնակը մասնավորապես խոսել էր բանակում ծխախոտի վատ ազդեցության մասին։
«Ծխախոտը բանակում վատ ազդեցություն ունի՝ և՛ կանոնադրական հարաբերությունների տեսանկյունից, և՛ սոցիալական․ մեկը կարողանում է լավ սիգարետ գնել, մյուսը չի կարողանում, իրարից են ուզում։ Ես, որպես զինծառայող, առնչվել եմ այնպիսի դեպքերի հետ, որ շատերը չծխող եկել են ու բանակում սկսել ծխել։ Մենք ուզում ենք, որ բանակից վերադարձող մեր քաղաքացիները մտավոր և ֆիզիկական ավելի լուրջ կարողություններ ունենան»,- ասել է նա։
Պաշտպանության նախարարության մամուլի քարտուղար Արամ Թորոսյանը Factor.am-ի հետ զրույցում հայտնեց, որ արդեն երկար տարիներ նախարարությունը զինվորներին ծխախոտ չի հատկացնում։
Հակոբ Արշակյանը նաև կարծիք էր հայտնել, որ պետք է մինչև 21 տարեկաններին արգելել ծխախոտի վաճառքը՝ զորանոցների, համալսարանների տարածքներում, ինչպես նաև արգելվի ընտանիքներին բանակում գտնվող տղաներին ծխախոտ տանել։
Ինչ վերաբերվում է ծնողների կամ հարազատների կողմից զինծառայողներին ծխախոտ ուղարկելու դեպքերին Արամ Թորոսյանն ասաց․ «Ծխախոտն արգելված իր չի համարվում, որը ծնողների կամ հարազատների կողմից ուղարկվում է զինվորներին»։
Նշենք, որ, ըստ Արշակյանի, ծխախոտի առումով նույն պատկերն է նաև համալսարաններում։ ԱԺ փոխնախագահը բերել էր ԱՄՆ-ի օրինակն՝ ընդգծելով, որ այդ երկրում մինչև 21 տարին չլրացած անձինք չեն կարող ծխախոտ գնել։
Ի դեպ, ԱԺ փոխնախագահը հայտնել էր, որ քաղաքացիները կարող են կարծիք հայտնել իր առաջարկի վերաբերյալ։
Մանյա Պողոսյան
