Տնտեսվարողն ահազանգում է. հավկիթի շուկայում դեմպի՞նգ է

Հավկիթ արտադրող ընկերություններից մեկն ահազանգում է՝ շուկայում դեմպինգ է իրականացվում։ Factor.am-ի խմբագրություն զանգահարած անձը հայտնեց, որ Զատիկին ընդառաջ հավկիթի շուկայում որոշ ընկերություններ ինքնարժեքից ցածր գնով են վաճառում հավկիթը։

«Եթե այսպես շարունակվի, մյուս արտադրողները լուրջ վնասներ են կրելու»,- նշեց ընկերության ներկայացուցիչը։ Հիսուս Քրիստոսի հրաշափառ Հարության տոնը Հայ առաքելական եկեղեցին այս  տարի նշում է ապրիլի 20-ին։

Factor.am-ը շրջել է մայրաքաղաքի խոշոր սուպերմարկետների ցանցերում և արձանագրել, որ տարբեր չափի հավկիթների գները տատանվում են 50-99 դրամի սահմաններում։

Մրցակցության պաշտպանության հանձնաժողովից Factor.am-ին հայտնեցին, որ շուկայի խոշոր ընկերությունների մոտ վերջին ամսում գների էական փոփոխություն չի արձանագրվել։

Չնայած գների կայունությանը, փետրվարի 18-ին հանձնաժողովը վարույթ է հարուցել «ՆՆ Հոլդինգ» ընկերության կողմից տնտեսական մրցակցության բնագավառում իրավախախտման վերաբերյալ։ ՄՊՀ-ն արձանագրել է, որ  ընկերությանը պատկանող «88» առևտրային ցանցում վաճառվում են միայն իր հետ փոխկապակցված «Շիրակ ԹՖ» ՍՊԸ-ի արտադրած հավկիթներ․ N01 չափը՝ 29 դրամ, N02-ը՝ 34 դրամ, և N03-ը՝ 41 դրամ գնով։ Նման վարքագիծը, ՄՊՀ-ի գնահատմամբ, պարունակում է «բանակցային դիրքի չարաշահման հատկանիշներ», վարույթը դեռ շարունակվում է։

Այցելեցինք նաև «88» սուպերմարկետ․ այդտեղ իսկապես ներկայացված էր միայն «Շիրակ» թռչնաֆաբրիկայի արտադրանքը՝ 38-60 դրամով (կախված չափից)։

Ի դեպ՝ նախորդ տարիներին «Շիրակ ԹՖ»-ն նույնպես հայտնվել է ՄՊՀ-ի ուշադրության կենտրոնում՝ հավկիթի ցածր գների պատճառով։

Նշենք, որ «ՆՆ հոլդինգ», «Շիրակ ԹՖ» ՍՊԸ-ների սեփականատերը Նարեկ Նալբանդյանն է, որը հայտնի դարձավ Հովիկ Աբրահամյանի՝ Մոնումենտի թանկարժեք դղյակն ու Ծաղկաձորի «Գոլդեն Փելիս» հյուրանոցային համալիրը գնելու գործարքներով: 

Գայանե Խաչատրյան