Հայաստանը ԵՄ-ում պաշտպանության հարցերով կցորդ կունենա

Հայաստանը Եվրոպական միությունում ՀՀ ներկայացուցչությանը կից պաշտպանության հարցերով կցորդ կունենա։ Որոշման նախագիծն ընդգրկված է կառավարության այսօրվա նիստի օրակարգի չզեկուցվող հարցերի փաթեթում։

Նախագիծը ՀՀ կառավարությանը ներկայացրել է Պաշտպանության նախարարությունը։

Ըստ կառավարութան հիմնավորման՝ որոշումը կայացվել է՝ հաշվի առնելով վերջին շրջանում պաշտպանական, անվտանգային և ռազմական ոլորտներում Եվրոպական միության հետ Հայաստանի համագործակցության էական զարգացումը։

«Հաշվի առնելով վերջին շրջանում պաշտպանական, անվտանգային և ռազմական ոլորտներում Բելգիայի և Եվրոպական միության հետ Հայաստանի համագործակցության էական զարգացումը՝ նախատեսվում է Հյուսիսատլանտյան պայմանագրի կազմակերպությունում (այսուհետ՝ ՆԱՏՕ) ՀՀ առաքելությանը կից պաշտպանական հարցերով կցորդին համատեղության կարգով Եվրոպական միությունում, ինչպես նաև Բելգիայի Թագավորությունում ՀՀ պաշտպանության հարցերով կցորդ նշանակելը և հավատարմագրելը»,- ասված է որոշման հիմնավորումներում։
Նախագծում նշվում է նաև, որ Եվրոպական միությունում ՀՀ ներկայացուցչությանը կից գործելն արդյունավետ համագործակցության, ինչպես նաև տարբեր քննարկումներին մասնակցության միջոցով պաշտպանության հարցերով կցորդը հնարավորություն է տալիս ներկայացնելու Հայաստանի ռազմական, ռազմաքաղաքական առաջնահերթությունները և միջազգային խաղաղության և անվտանգության պահպանման համատեքստում մոտեցումները:

Հիմնավորման համաձայն՝ որոշմանը ընդունումը հնարավորություն կստեղծի ՀՀ պաշտպանության նախարարության համար Եվրոպական միությունում պաշտպանության հարցերով կցորդի միջոցով արդյունավետ աշխատանքի համար, կնպաստի ինստիտուցիոնալ կապերի հետագա ամրապնդմանը և զարգացմանը, ինչպես նաև ռազմական և ռազմաքաղաքական փոխգործակցության հնարավորությունների ընդլայնմանը:
Հայաստանի Հանրապետությունը պաշտպանության հարցերով կցորդ կունենա նաև Բելգիայի Թագավորությունում։