Քաղաքականություն
27.02.2025 | 18:25
«Տավուշից է սկսվելու սահմանազատումը՝ հյուսիսային անկյունից»,- այս մասին լրագրողների հետ ճեպազրույցում հայտարարեց սահմանազատման հարցերով հայկական հանձնաժողովի նախագահ, փոխվարչապետ Մհեր Գրիգորյանը։
Նրա խոսքով՝ կողմերի ընդհանուր կոնսենսուսի արդյունքում են որոշել սահմանազատումը սկսել այդ հատվածից։
Հարցին՝ արդյոք 1978 թվականի քարտեզով է սահմանզատումն իրականացվելու, Մհեր Գրիգորյանն ասաց․ «1978 թվի քարտեզ թե ով է ասել, ես չեմ տեսել»։
Հիշեցնենք, այսօր «Սպուտնիկ Արմենիան» իր տվյալներով գրել էր, որ Տավուշում սահմանազատումը կշարունակվի 1978 թվականի քարտեզով։
Սահմանազատման հայկական հանձնաժողովի նախագահը նաև չհայտնեց, թե երբ է սկսվելու սահմանազատման գործընթացի երկրորդ փուլը։
Պատասխանելով հարցին՝ հնարավո՞ր է այս տարի սահմանազատում իրականացվի նաև Ջերմուկի հատվածում, փոխվարչապետը արձագանքեց։
«Չեմ կարող այդ հարցին պատասխանել, որովհետև աշխատանքային հանդիպման արդյունքում մենք անպայման կհրապարկենք մեր անելիքները։ Պայմանավորվածություններ կան, որ ինտենսիվ պետք է լինեն հանդիպումները»,- նշեց նա։
Հիշեցնենք, որ հունվարի 16-ին Հայաստանի Հանրապետության և Ադրբեջանի Հանրապետության սահմանին տեղի է ունեցել Հայաստանի Հանրապետության և Ադրբեջանի Հանրապետության միջև պետական սահմանի սահմանազատման և սահմանային անվտանգության հարցերով հանձնաժողովի և Ադրբեջանի Հանրապետության և Հայաստանի Հանրապետության միջև պետական սահմանի սահմանազատման պետական հանձնաժողովի տասնմեկերորդ հանդիպումը՝ Հայաստանի Հանրապետության փոխվարչապետ Մհեր Գրիգորյանի և Ադրբեջանի Հանրապետության փոխվարչապետ Շահին Մուստաֆաևի նախագահությամբ:
Հանդիպման ընթացքում համաձայնության են եկել սահմանազատման համալիր աշխատանքները սկսել պետական սահմանի հյուսիսային հատվածից՝ Հայաստանի Հանրապետության, Ադրբեջանի Հանրապետության և Վրաստանի սահմանների հատման կետից և այնուհետև հարավային ուղղությամբ՝ հյուսիսից հարավ մինչև Հայաստանի Հանրապետության և Ադրբեջանի Հանրապետության սահմանը Իրանի Իսլամական Հանրապետության հետ:
