Պլաստիկ վիրահատության հետևանքով մահվան դեպք է գրանցվել  «Ուիգմոր» բժշկական  կենտրոնում

Պլաստիկ վիրահատության հետևանքով մահվան դեպք է գրանցվել  «Ուիգմոր» բժշկական  կենտրոնում: Դեպքի առթիվ ՔԿ մամուլի խոսնակ Կիմա Ավդալյանը Factor.am-ին հայտնեց, որ նախաձեռնվել է քրեական վարույթ Քրեական օրենսգրքի 187-րդ հոդվածի 2-րդ մասի հատկանիշներով, այն է՝ բուժաշխատողի կողմից մասնագիտական պարտականությունները չկատարելը կամ ոչ պատշաճ կատարելը անզգուշությամբ առաջացրել է մարդու մահ կամ այլ ծանր հետևանք։

ՔԿ խոսնակի փոխանցմամբ՝  նշանակվել է դիակի դատաբժշկական փորձաքննություն:  Ավդալյանի խոսքով՝ այս պահին կատարվում են անհրաժեշտ ապացուցողական և վարույթային գործողություններ:

«Առողջություն և իրավունք» ՀԿ համահիմնադիր Անուշ Պողոսյանը ֆեյսբուքի իր էջում գրել է, որ, ըստ հավաստի աղբյուրների, փետրվարին «Ուիգմոր»-ում արձանագրվել է պլաստիկ վիրահատության հետևանքով ողբերգական մահվան դեպք։

Դեպք վերաբերյալ Factor.am-ը փորձեց նաև մեկնաբանություն ստանալ  «Ուիգմոր» բժշկական կենտրոնից։ Կլինիկայից խոստացան մեզ հետ կապ հաստատել։ Այս պահի դրությամբ, սակայն,  «Ուիգմոր»-ից դեռ մեզ չեն պատասխանել, զուգահեռ Factor.am-ը նաև գրավոր հարցում է ուղարկել բժշկական կենտրոն։

Ըստ շրջանառվող տեղեկությունների՝  «Ուիգմոր»-ը փոխկապակցված է առողջապահության նախարար Անահիտ Ավանեսյանի ընտանիքի  հետ։ Նախարարը, սակայն, հերքել է՝ պնդելով, որ  «Ուիգմոր» կլինիկան իր ընտանիքի հետ կապ չունի։

Հիշեցնենք, որ  մեկ այլ՝  «Արթկոսմեդ» էսթետիկ վիրաբուժության կլինիկայում  նախորդ տարի հոկտեմբերի 5-ին գրանցվել էր 56-ամյա կնոջ մահվան դեպք։ Սա այդ կլինիկայում գրանցված արդեն երկրորդ մահվան դեպքն էր  պլաստիկ վիրահատության ընթացքում։ Նախորդ տարի էլ երիտասարդ կին էր մահացել: Առողջապահության նախարար Անահիտ Ավանեսյանն էլ հայտարարել էր, որ տեսչական մարմնից ստացել են «Արթկոսմեդ» էսթետիկ վիրաբուժական կենտրոնի լիցենզիայի կասեցման միջնորդություն: Այս պահին «Արթկոսմեդ»-ի լիցենզիան կասեցված է։

Մանյա Պողոսյան