25.05.2026 | 16:00
Տղամարդավարի ներողություն խնդրիր Օսիպյանից. Տիգրան Պետրոսյանը դիմեց Փաշինյանին․ ՏԵՍԱՆՅՈՒԹ
Բժիշկները դեղատոմսի դուրս գրման կանոն չե՞ն խախտել․ Ավանեսյանի պնդումն ու տեսչական մարմնի տվյալները հակասում են իրար
25.02.2025 | 12:59
«Բժիշկների նկատմամբ տեսչական մարմիններն են վարչարարություն իրականացնում, և տուգանվում են թե՛ բժիշկները, թե՛ դեղատները»,- այս մասին հայտարարել էր առողջապահության նախարար Անահիտ Ավանեսյանը փետրվարի 12-ի ԱԺ-Կառավարություն հարցուպատասխանի ժամանակ՝ պատասխանելով ՔՊ-ական պատգամավոր Արման Եղոյանի հարցին, թե դեղ գնելիս 90 տոկոս դեպքերում մարդը էլեկտրոնային դեղատոմս չի ունենում, դեղատներն էլ ասում են՝ մե՞նք պիտի վարչարարություն իրականացնենք բժիշկների նկատմամբ:
Դեղատներից էլեկտրոնային դեղատոմսերով բաց թողնման ենթակա դեղերի վաճառքի նկատմամբ վերահսկողությունն իրականացնում է Առողջապահական և աշխատանքի տեսչական մարմինը ստուգումների և հարուցված վարչական վարույթների միջոցով։ Factor.am-ը հարցում էր ուղարկել տեսչական մարմին՝ պարզելու, թե բժիշկների կողմից առանց էլեկտրոնային դեղատոմսի դեղերի դուրս գրման և էլեկտրոնային դեղատոմսով բաց թողնվող դեղերն առանց դեղատոմսի վաճառելու քանի դեպք է գրանցվել։
Տեսչական մարմնից փոխանցել են, որ 2024 և 2025 թվականներին էլեկտրոնային դեղատոմսով բաց թողնվող դեղերի դեղատոմսերի լրացման, դուրսգրման և իրացման խախտումների դեպքեր տեսչական մարմնում առկա չեն։ Այսինքն, բժիշկների կողմից խախտման դեպքեր վերահսկող մարմինը չի արձանագրել, այնինչ առողջապահության նախարարը վստահեցնում էր, որ տեսչական մարմինը բժիշկների նկատմամբ վարչարարություն է իրականացնում։
Տեսչական մարմինից հայտնում են նաև, որ 2024 թվականին արձանագրվել է խախտման 43 հազար 99 դեպք՝ ընդհանուր 35 տնտեսվարող սուբյեկտի մոտ, իսկ 2025 թվականին արձանագրվել է 941 դեպք՝ ընդհանուր 6 տնտեսվարող սուբյեկտի մոտ։
Արդյունքում, արձանագրված յուրաքանչյուր խախտման համար տնտեսվարող սուբյեկտները ենթարկվում են վարչական տույժի՝ Վարչական իրավախախտումների վերաբերյալ ՀՀ օրենսգրքի 47․3 հոդված 7-րդ մասով, համաձայն որի՝ դեղատոմսով բաց թողնվող դեղերն առանց դեղատոմսի կամ ՀՀ օրենսդրությամբ սահմանված պահանջների չհամապատասխանող ձևաթղթերի վրա դուրս գրված դեղատոմսերով իրացնելը՝ առաջացնում է տուգանքի նշանակում՝ յուրաքանչյուր անվանմամբ դեղի համար՝ սահմանված նվազագույն աշխատավարձի հնգապատիկի չափով։
Անի Թամրազյան
