ՆԳՆ-ն հերքում է Տիգրան Ավինյանին․ վթարված մեքենաներից ընդամենը մեկն է եղել ամառային անվադողերով

Երևանի քաղաքապետ Տիգրան Ավինյանը, անդրադառնալով ձյան առատ տեղումների ժամանակ մայրաքաղաքում ստեղծված իրավիճակին, գործակարգավարական այսօրվա նիստի ժամանակ նշել է, որ խցանումների առաջացման 80 տոկոսը ամառային անվադողերով ավտոմեքենաների ԱՊՊԱ-ների հետևանքով էր։

«Մի հատ թեթև իրար քսելու պատճառով ժամերով սպասել ու ստեղծել են կիլոմետրանոց հերթեր։ Եվ մարդիկ մեղավոր չեն, մարդիկ չեն կարող մեղավոր լինել այստեղ։ Մարդիկ, միգուցե, մեղավոր են, որ ամառային անվադողերով են դուրս եկել փողոց, բայց, այնուամենայնիվ, այդ համակարգը Երևան քաղաքի համար աղետ է։ Աղետ է այն առումով, որ ամեն իրար թեթև քսված մեքենաները ժամերով ամբողջ երթևեկությունը կանգնեցնում են»,-ասել է քաղաքապետը՝ հավելելով, որ սա խնդիր է ստեղծել նաև աղ ու ավազ ցանող տեխնիկայի համար։

Factor TV-ն ՆԳՆ խոսնակից հետաքրքրվեց, թե այս օրերին ՆԳՆ-ն քանի ՃՏՊ է արձանագրել և մեքենաներից քանիսն են եղել ամառային անվադողերով։

«Փետրվարի 20-ից 24-ը՝ մինչև ժամը 08։00-ն, Երևանում արձանագրվել է ճանապարհատրանսպորտային 482 պատահար։ Նշված 482 պատահարների հաշվառմամբ՝ 1 տրանսպորտային միջոց եղել է ամառային անվադողերով, իսկ 8 մեքենա եղել է ձմեռային մաշված անվադողերով։ Միաժամանակ՝ նույն ժամանակահատվածում Երևանում պարեկները ստուգել են 193 տրանսպորտային միջոց, որոնցից 15-ը եղել են ձմեռային մաշված անվադողերով»,- ասաց Նարեկ Սարգսյանը։ Ըստ ՆԳՆ խոսնակի՝ նշված բոլոր 482 դեպքերում պարեկային ծառայողներն են մոտեցել և արձանագրել վթարը։

Ստացվում է՝ ՆԳՆ-ն հերքում է Տիգրան Ավինյանի պնդումը։ Ուշագրավ է, որ այսօր քաղաքապետը նշեց, որ այս համատեքստում մտադիր է Երևանի ՏԻՄ օրենքում նոր փոփոխություն առաջարկել։ Ըստ այդ փոփոխությունների՝ պատահարների դեպքում փողոցի երթևեկելի մասը փակ պահելու համար կսահմանվի 15 րոպե, հակառակ դեպքում՝ կսահմանվի պատասխանատվություն։

Արփի Հակոբյան