Մերցը հաղթում է, Շոլցը՝ տապալվում․ Գերմանիայի ընտրությունների արդյունքները

Գերմանիայի Բունդեսթագի արտահերթ ընտրություններում, որոնք տեղի են ունեցել կիրակի՝ փետրվարի 23-ին, հաղթել է ընդդիմադիր պահպանողական ՔԴՄ/ՔՍՄ դաշինքը (Քրիստոնեա-դեմոկրատական միություն և Քրիստոնեա-սոցիալական միություն)՝ հավաքելով ձայների 28,5 տոկոսը։ Սա 2-5 տոկոսային կետով պակաս է առավելագույն թվից, որին դաշինքը հասել է ընդդիմադիր երեքուկես տարիների ընթացքում, փոխանցում է DW-ի ռուսական ծառայությունը։

Ըստ Tagesschau.de-ի՝ սոցիոլոգները կարծում են, որ սպասվածից պակաս արդյունքի պատճառներից մեկը կանցլեր Անգելա Մերկելի ժառանգությունն է և նրա լիբերալ միգրացիոն քաղաքականությունը։

Քրիստոնեա-դեմոկրատական միության առաջնորդ Ֆրիդրիխ Մերցը վաղուց հայտարարել է կուրսի փոփոխության մասին, սակայն, ըստ ամենայնի, նրան չի հաջողվել համոզել բոլոր նրանց, ովքեր մինչև վերջերս պատրաստ էին քվեարկել կուսակցության օգտին: Մերցը հուսով է, որ մինչև ապրիլի վերջ կստանձնի իր պաշտոնը:

Հաղորդվում է, որ մինչև ուշ գիշեր ՔԴՄ/ՔՍՄ ապագա իշխող կոալիցիայում պահպանվում էր ինտրիգը։ Եթե Սահրա Վագենկնեխտի ձախ պոպուլիստական միությունը հաղթահարեր խորհրդարան մտնելու համար անհրաժեշտ 5 տոկոսի շեմը, ապա հնարավոր կլիներ միայն կառավարական կոալիցիա, որը բաղկացած կլիներ ՔԴՄ/ՔՍՄ-ից, Սոցիալ դեմոկրատական կուսակցությունից և ձախ-ազատական «Դաշինք 90/Կանաչներ»-ից: Սա շատ ավելի կդժվարացներ կառավարության ձևավորումը, քանի որ պահպանողականները խոր տարաձայնություններ ունեն Կանաչների հետ:

Այնուամենայնիվ, ձախ պոպուլիստները, որոնք հավաքել են 4,972 տոկոս ձայն, չեն մտել Բունդեսթագ, և մեծամասնական կառավարական կոալիցիա կարող են ստեղծել ՔԴՄ/ՔՍՄ-ն և Սոցիալ դեմոկրատական կուսակցությունը՝ առանց Կանաչների:

Թարգմանությունը՝ Տաթև Ֆռանգյանի