27.06.2026 | 12:48
Գտնում եմ, որ ողջ ՀՀ-ում պետք է վերաքվեարկություն նշանակվի, անվավեր ճանաչվի այս ընտրությունը․ Օրբելյան․ ՏԵՍԱՆՅՈՒԹ
Մոխրամանով է հարվածել շտապօգնության բուժակի դեմքին․ մեկ անձ ձերբակալվել է
Հասարակություն
21.02.2025 | 13:19
Ազատան գյուղում Շտապօգնության աշխատակցին բռնության ենթարկելու դեպքով մեկ քաղաքացի է ձերբակալվել։ Այս մասին Factor.am-ին փոխանցեց ՆԳՆ խոսնակ Նարեկ Սարգսյանը։
«Փետրվարի 21-ին ժամը 06․40-ին ՆԳՆ ոստիկանության Շիրակի մարզի օպերատիվ կառավարման կենտրոն շտապօգնությունից հաղորդում է ստացվել, որ գանգուղեղային վնասվածքով Ազատան բնակավայրից «Գյումրի» բժշկական կենտրոն բուժօգնության է տեղափոխվել 31-ամյա բուժակը։ Մեկնել է Համայնքային ոստիկանության Ախուրյանի բաժնի օպերատիվ խումբը։ Երիտասարդը հայտնել է, որ ժամը 05․10-ի սահմաններում կանչով մեկնել է Ազատան բնակավայրի 28-րդ փողոցի տներից մեկը, որտեղ 75-ամյա քաղաքացուն օգնություն ցուցաբերելու ընթացքում նրա որդին՝ 44-ամյա տղամարդը մոխրամանով հարվածել է դեմքին՝ պատճառելով մարմնական վնասվածքներ։ Տուժողից ընդունվել է հաղորդում։ 44-ամյա տղամարդը ձերբակալվել և տեղափոխվել է Համայնքային ոստիկանության Ախուրյանի բաժին։ Կազմված փաստաթղթերը ներկայացվել են Շիրակի մարզային քննչական վարչություն»,-ասաց նա։
ՔԿ-ից էլ փոխանցեցին, որ նախաձեռնվել է քրեական վարույթ՝ Քրեական օրենսգրքի 195-րդ հոդվածի 2-րդ մասի 1-ին կետով: Կա մեկ տուժող: Կատարվում է նախաքննություն:
Ավելի վաղ հայտնել էինք, որ շտապօգնության աշխատակից Մհեր Քալոյանի մոտ ախտորոշվել է քթի բեկորային կոտրվածք՝ արյունահոսող վնասվածքներով։ Նա ստացել է համապատասխան բուժօգնություն, առողջական վիճակը գնահատվում է բավարար։
