Ադրբեջանում հերթական լրագրողն է ձերբակալվել

Ադրբեջանի իշխանությունները շարունակում են բռնաճնշումները անկախ ու ընդդիմադիր լրագրողների, գործիչների ու ակտիվիստների նկատմամբ։ Տեղական լրատվամիջոցների հաղորդմամբ՝ ձերբակալվել է անկախ լրագրող Նուրլան Ղահրամանլին (առավել հայտնի է որպես Լիբրե)։

Նրա հարազատները տեղական լրատվամիջոցներին հայտնել են, որ ոստիկանները նրան ձերբակալել են Բաքվում, ապա տարել են Սումգայիթի իր տուն, որտեղ խուզարկություն է անցկացվել:

ՆԳՆ մամուլի ծառայությունն էլ հայտնել է, որ լրագրող Նուրլան Ղահրամանլին ձերբակալվել է Meydan TV-ի աշխատակիցների դեմ հարուցված քրեական գործով։

Meydan TV-ի լրագրողները ձերբակալվել են 2024 թվականի դեկտեմբերի 6-ին։ Նրանց բոլորին մեղադրանք է առաջադրվել Ադրբեջանի քրեական օրենսգրքի 206.3.2 հոդվածով (մաքսանենգություն, որը կատարվել է մի խումբ անձանց կողմից նախնական համաձայնությամբ):

Meydan TV-ն ու կալանավորված լրագրողները հերքում են մեղադրանքները։ Նրանք պնդում են, որ ձերբակալվել են իրենց լրագրողական գործունեության համար և ենթարկվել են ճնշումների՝ կապված իրենց մասնագիտական ​​գործունեության հետ։ 2025 թվականի փետրվարի 5-ին Meydan TV-ի մեկ այլ աշխատակից, ինչպես նաև «argument.az» կայքի գլխավոր խմբագիր Շամշադ Աղան նույնպես ձերբակալվել է նույն մեղադրանքով։

Ընդհանուր առմամբ, 2023 թվականի նոյեմբերից Ադրբեջանում մաքսանենգության մեղադրանքով կալանավորվել են շուրջ 30 լրագրողներ և հասարակական ակտիվիստներ։ Նրանցից ոչ ոք չի ընդունում մեղքը և իր ձերբակալությունը կապում է մասնագիտական ​​գործունեության ու քաղաքական պատվերների հետ։

Թարգմանությունը՝ Էմմա Չոբանյանի