06.10.2026 | 16:12
Հայաստանի Մ-20 հավաքականը 11-մետրանոցներով պարտվեց Սաուդյան Արաբիային. ՏԵՍԱՆՅՈՒԹ
Եվրոպացի առաջնորդները Փարիզում կքննարկեն Ուկրաինա խաղաղապահներ ուղարկելու հարցը․ FT
Քաղաքականություն
17.02.2025 | 14:44
Փետրվարի 17-ին Փարիզում կայանալիք արտակարգ գագաթնաժողովում եվրոպացի առաջնորդները կքննարկեն Ուկրաինա խաղաղապահներ ուղարկելու հնարավորությունը՝ հրադադարը վերահսկելու համար։ Այս մասին երեք անանուն պաշտոնյաներ ասել են Financial Times-ին:
Առայժմ, ըստ նրանց, Գերմանիան «զգուշանում» է նախաձեռնությունից։
Նախօրեին Մեծ Բրիտանիայի վարչապետ Քիր Սթարմերը հայտարարել է, որ պատրաստ է հրադադարից հետո բրիտանական զորքեր ուղարկել Ուկրաինա՝ անվտանգության երաշխիքներ ապահովելու համար։ Associated Press-ը գրել էր, որ եվրոպական երկրները, մասնավորապես, Ֆրանսիան և Մեծ Բրիտանիան, «գաղտնի» աշխատում են համապատասխան պլանի վրա, բայց շատ բան կախված է նրանից, թե ինչպիսին կլինի շփման գիծն Ուկրաինայում։ Խաղաղապահ ուժերի կազմը նույնպես կախված է խաղաղության պայմանագրի մանրամասներից, ընդգծել են գործակալության աղբյուրները։
Փարիզում արտակարգ գագաթնաժողովը, որին կմասնակցեն Գերմանիայի, Իտալիայի, Լեհաստանի, Իսպանիայի, Նիդերլանդների, Դանիայի և Մեծ Բրիտանիայի կառավարությունների ղեկավարները, կազմակերպվում է եվրոպական երկրների միջև խաղաղ կարգավորման շուրջ ԱՄՆ-ի հետ շփումների ֆոնին խորհրդակցությունների համար։ Գագաթնաժողովի նպատակն է համաձայնեցնել ընդհանուր եվրոպական դիրքորոշումն այս հարցում։
Թարգմանությունը՝ Տաթև Ֆռանգյանի
