13.12.2025 | 22:20
Ֆրանսիան հաղթեց «Մանկական Եվրատեսիլ»-ում
Աշխարհի ամենամեծ հայկական գաթան՝ գինեսի ռեկորդների գրքում
Մշակույթ
27.09.2018 | 14:34
«Երեմյան փրոջեքթս» ընկերությունը Երևանի 2800-ամյակին ընդառաջ հրավիրում է մասնակցելու մայրաքաղաքի ծննդյան տոնին նվիրված «Աշխարհի ամենամեծ գաթա» համտես-հյուրասիրությանը, որը տեղի կունենա սեպտեմբերի 28-ին, ժամը 12։30-ին Երևանում, Կարապի լճի տարածքում։
«Երեմյան փրոջեքթս»-ը հատուկ բաղադրատոմսով պատրաստված գաթան որպես աշխարհի ամենամեծ գաթա ռեկորդների գրքում ներառելու նպատակով դիմել է «GUINNESS WORLD RECORDS»-ին։ Ներկայացվող գաթայի քաշը ըստ նախնական գնահատականի 280 կիլոգրամ է:
Միջոցառմանը մասնակցելու և ռեկորդը գրանցելու նպատակով Հայաստան հատուկ այցով կժամանի «GUINNESS WORLD RECORDS LIMITED» գրասենյակի ներկայացուցիչ՝ միջազգային արբիտոր Ջոանա Մարի Բրենտը։
Գաթան պատրաստվելու է «Երեմյան փրոջեքթս»-ի հրուշակագործների թիմի կողմից. ընկերության շեֆ- հրուշակագործ Անահիտ Միքայելյանի ղեկավարությամբ կաշխատեն 3 մասնագետ։
«Աշխարհի ամենամեծ գաթան» թխվում է նորովի ներկայացված հայկական բաղադրատոմսով և Գինեսի ռեկորդների գրասենյակի բոլոր կանոններին համապատասխան ընթացակարգով։
«GUINNESS WORLD RECORDS LIMITED» գրասենյակի ներկայացված պահանջների և ընթացակարգին համապատասխանելու վերաբերյալ գաթայի պատրաստման յուրաքանչյուր փուլում մասնագետ-«վկաներն» իրականացելու են մշտադիտարկում, և մասնագիտական գնահատական են ներկայացնելու ընթացակարգին համապատասխանելու վերաբերյալ։ Այսպես, բժիշկ-սննդաբան Վարդանուշ Պետրոսյանը պատասխանատու է ամբողջ գործընթացի և ընթացակարգի պահպանելու համար։ Ազգագրագետ, հայկական ծիսական ուտեստների մասնագետ Ռուզաննա Ծատուրյանի գործառույթն է հետևել և հավաստել, որ պատրաստված աղանդերը հենց գաթա է։ ՀՀ Սննդամթերքի անվտանգության և որակի հսկողության տեսչության ավագ մասնագետ Գևորգ Մելքոնյանը հետևելու է սանիտարահիգիենիկ նորմերի ապահովման կանոններին: Գաթան կշռվելու է հատուկ արտադրական կշեռքով՝ գործընթացի պատասխանատուն է Չափագիտության ազգային ինստիտուտի Մեխանիկական և անկյունագծային չափումների լաբորատորիայի մասնագետ-չափագրող Գուրգեն Ասրյանը:
Այս իրադարձությունն իր շուրջը կհամախմբի երևանցիներին, մայրաքաղաքի հյուրերին և զբոսաշրջիկներին, որոնք հենց տեղում հնարավորություն կունենան գնահատելու գաթայի համը:
