22.05.2026 | 23:01
Ռուսաստանը ժամանակավորապես արգելել է «Ջերմուկ» հանքային ջրի ներմուծումն ու վաճառքը
Արցախի հարցով շեշտադրումները շատ հետաքրքիր էին. Արման Նավասարդյանը՝ ՄԱԿ-ում Փաշինյանի ելույթի մասին. ՏԵՍԱՆՅՈՒԹ
Քաղաքականություն
26.09.2018 | 15:31
Ղարաբաղյան հարցով շեշտադրումները շատ հետաքրքիր էին: Այսօր՝ սեպտեմբերի 26-ին, լրագրողների հետ հանդիպմանն անդրադառնալով ՄԱԿ-ում ՀՀ վարչապետ Նիկոլ Փաշինյանի ելույթին՝ ասաց արտակարգ և լիազոր դեսպան Արման Նավասարդյանը:
«Կենտրոնում դրված էր այն հարցը, որ Ղարաբաղը հանդիսանում է բանակցային կողմ: Ղարաբաղը հանդիսանում է այն ֆիգուրանտը, որը տեղ է գրավելու այդ բանակցություններում: Եվ համեմատությունները շատ հետաքրքիր էին Փաշինյանի արած: Ասաց՝ ինչպե՞ս կարող են նրանք խոսել Ղարաբաղի անկախության՝ իրենց առումով անկախության, և Ադրբեջանի կազմում լինելու մասին, երբ ամեն ինչ արվում է այդտեղի ժողովրդին ոչնչացնելու համար, ինչպես արվեց Նախիջևանում: Ի դեպ՝ առաջին անգամ է, երբ այդ մակարդակով Նախիջևանի մասին հնչում է հարցը»,- ասաց Արման Նավասարդյանը:
Նիկոլ Փաշինյանի ելույթը Նավասարդյանն ընդհանրապես դրական է գնահատում. «Ես մասնակցել եմ նման միջոցառումների ՄԱԿ-ում և գիտեմ ներքին խոհանոցը: Եվ գիտեմ, թե որքան կարևոր է պետության ղեկավարի, մասնավորապես, հաջող ելույթը այդ ամբիոնից: Իսկ այն հաջող էր մի քանի առումով: Նախ՝ հաջող էր այն առումով, որ միջազգային հանրության ուշադրությանը, այդ թվում՝ քաղաքական շրջանակների, վերջին շրջանում սևեռված է Փաշինյանի վրա: Դա մեծ հնարավորություններ է ստեղծում և բարենպաստ պայմաններ, որպեսզի այդ պատվիրակությունն ուշադրություն գրավի միջազգային հանրության կողմից»:
Վարչապետի ելույթն Արման Նավասարդյանը շատ հաջող է համարում նաև տեխնիկական առումով: Նրա խոսքով՝ ճիշտ անգլերենով արտասանված ելույթը հաջողության գրավական է: Դիվանագետն ուշադրություն հրավիրեց նաև Նյու Յորք այցի շրջանակում տեղի ունեցած հանդիպումների վրա՝ կարևորելով, մասնավորապես, Իրանի նախագահ Հասան Ռոհանիի հետ հանդիպումը:
«Հանդիպումները, որ մենք տեսանք, շատ խոստումնալից և հեռանկարային էին, մասնավորապես Իրանի նախագահ Ռոհանիի հետ հանդիպումը: Դա նախերգանքն է այն կարևոր այցելության, որ տեղի է ունենալու վերադառնալուց հետո: Իրանը շատ մեծ նշանակություն ունի Հայաստանի արտաքին քաղաքականության ներկապնակում, և այդ այցելությունը կարող է շրջադարձային կետ հանդիսանալ ոչ միայն քաղաքական, այլ նաև տնտեսական առումով»,- նշեց Արման Նավասարդյանը:
Մանրամասները՝ տեսանյութում
