01.06.2026 | 22:54
Ինչպես հայտագրել առաջին դասարանցիներին
8 հսկիչ՝ 850 ավտոբուսի համար․ նրանք կարո՞ղ են տուգանել ուղևորին
Հասարակություն
07.02.2025 | 17:25
Factor TV-ն զրուցել է «Երևանի ավտոբուս» ՓԲԸ-ի մամուլի խոսնակ Գեղամ Ասատրյանի հետ։
-Համացանցում մի քանի օր է՝ տեսանյութեր են տարածվում, որտեղ վարորդները բոյկոտող քաղաքացիներին հորդորում են իջնել ավտոբուսից, հակառակ դեպքում՝ հրաժարվում են վարել։ «Երևանի ավտոբուս» ՓԲԸ-ն նման հրահանգ տվե՞լ է վարորդներին։
– Վարորդներին հրահանգ այն մասով է միայն տրվել, որ պատշաճ կատարեն իրենց աշխատանքը։ Վարորդների աշխատանքային պայմանագրում կա կետ, որի համաձայն անհրաժեշտության դեպքում կարող են ուղևորներին հորդորել, որ ուղեվարձը պետք է վճարեն միայն օրենքով սահմանված կարգով (նկատի ունի ավագանու որոշումը – խմբ)։ Ձեր հարցադրման առումով որևէ զգուշացում կամ հրահանգ չկա։
-Բայց դա վարորդների՞, թե՞ հսկիչների գործառույթն է։
-Ըստ հաստիքացուցակի՝ գծային հսկիչների թիվը 8-ն է և մեկ բաժնի պետ։ Այս պահին գծային հսկիչի մեկ թափուր հաստիք ունենք: Գծային հսկիչների աշխատավարձը 294 հազար դրամ է։ Իսկ վերաբերում է տուգանքի մեխանիզմին՝ նրանք տուգանել չեն կարող, դրա համար օրենսդրական փոփոխություններ են անհրաժեշտ։ Գծային հսկիչների պարտականություններն են՝ երթուղիների հաճախականության վերահսկում, hասարակական տրանսպորտի արտաքին և ներքին մաքրության վերահսկում, վարորդների պատշաճ հագուստով աշխատանքի ներկայության ապահովում, ուղևորների հետ շփման ընթացքում բարեվարքության կանոնների պահպանման վերահսկում, վերահսկողական և աջակցող այլ գործառույթներ՝ այդ թվում վալիդատորների միջոցով վճարումների ընթացքում առաջացող խնդիրների մասին TelCell ընկերությանը տեղեկացնելը, ինչպես նաև քաղաքացիներին աջակցելը՝ վճարումը ճիշտ կատարելու գործընթացում։
-Հսկիչները քաղաքացիների վճարած հարկերից աշխատավարձ են ստանում, բայց հասարակական տրանսպորտում երբևէ չենք հանդիպել, ինչպե՞ս է ստացվում։
-Ութ աշխատող են, միաժամանակ բոլոր ավտոբուսներում չեն կարող լինել, բայց ամեն օր հսկողություն են իրականացնում։
– Հսկիչները համազգեստ կրո՞ւմ են։
–Չկա որևէ հագուստ, քաղաքացիական աշխատող են, քաղաքացիական հագուստով։
-Իսկ փաստաթուղթ ունե՞ն։
-Այս պահին չունեն, քանի որ կարիքը չկա․ այս պահին տուգանքի մեխանիզմ, ինչպես գիտեք, չկա։ Երբ դա լինի, համապատասխան փաստաթուղթ էլ կունենան։
-Եթե քաղաքացին չի վճարում կամ վճարում է 100 դրամ, վարորդը կարո՞ղ է ավտոբուսը կանգնեցնել և հայտարարել, որ չի քշի, մինչև տվյալ ուղևորը կամ ուղևորները չիջնեն ավտոբուսից։
-Աշխատում ենք հնարավորինս այնպես անել, որ նման դեպքերը բացառենք։ Եղած դեպքերի մասով ՓԲԸ-ում մի ամբողջ բաժին զբաղվում է դրանց արձագանքելով, ավտոբուսներում տեսախցիկները նայելով և առաջին հերթին վարորդների վարքին ուշադրություն դարձնելով։ Վարորդներին զգուշացվել է, որ կանխիկ մետաղադրամ չվերցնեն ուղևորներից։ Վարորդները միայն կարող են հորդորել գումարը ստանալ։
Արփի Հակոբյան
