10.08.2026 | 10:03
4 խաղափուլից հետո երեք հայ շախմատիստ առաջատարների շարքում է. Եվրոպայի Մ20 առաջնություն
ԵՄ-ն նախատեսում է վերանայել ՄԱԿ-ի փախստականների մասին կոնվենցիան․ Times
Քաղաքականություն
03.02.2025 | 13:10
Եվրամիությունը (ԵՄ) ծրագիր է մշակում 1951 թվականի ՄԱԿ-ի փախստականների կարգավիճակի մասին կոնվենցիան վերանայելու համար, գրում է The Times-ը՝ վկայակոչելով կառույցի համապատասխան փաստաթուղթը։ Նշված կոնվենցիան ամրագրել է փախստականին չվերադարձնելու հիմնարար սկզբունքը մի երկիր, որտեղ նա կարող է իր կյանքին կամ ազատությանը լուրջ սպառնալիքների բախվել:
Պարբերականի համաձայն՝ ԵՄ ավելի ու ավելի շատ երկրներ են համաձայնում, որ այս կոնվենցիան այլևս չի ծառայում իր նպատակին։
«Հարկ է նշել, որ այդ սկզբունքները մշակվել են Երկրորդ համաշխարհային պատերազմի ավարտից հետո և բնութագրվել են բոլորովին այլ աշխարհաքաղաքական իրավիճակով, քան այսօր»,- ասվում է ԵՄ դիվանագիտական փաստաթղթում։
Կոնվենցիան ստորագրել են 144 երկրներ։ Այն սահմանում է երկրների իրավական պարտավորությունները՝ ամրագրված չվերադարձման սկզբունքով. սա նշանակում է, որ ոչ մի ապաստան հայցող չի կարող հետ վերադարձվել երկիր, որտեղ նրա կյանքը կամ ազատությունը վտանգված է: Սակայն այդ սկզբունքն ավելի ու ավելի հաճախ է կասկածի տակ դրվում, քանի որ եվրոպական երկրները վերջին տասնամյակի ընթացքում պայքարում են միլիոնավոր փախստականների հայցերը մշակելու և մերժված ապաստան հայցողներին վերադարձնելու համար, գրում է թերթը:
2024 թվականի դեկտեմբերին՝ Սիրիայում իշխանափոխությունից հետո, եվրոպական երկրները սկսել են կասեցնել սիրիացի փախստականներից ապաստանի դիմումների ընդունման գործընթացը։ Որոշ երկրներ, օրինակ՝ Ավստրիան, որը հյուրընկալում է շուրջ 87,000 սիրիացիների, արդեն պատվիրել է վերանայել նույնիսկ վաղուց հաստատված ապաստանի դիմումները։
Թարգմանությունը՝ Տաթև Ֆռանգյանի
