20.02.2026 | 02:07
Ադելիա Պետրոսյանը մեդալ չնվաճեց ձմեռային Օլիմպիական խաղերում
Անհետ կորած զինծառայողների հարազատների մասնակցությամբ ԱԺ-ում փակ քննարկում տեղի կունենա
Հասարակություն
30.01.2025 | 10:45
Արցախյան 44-օրյա պատերազմում անհետ կորած զինծառայողների ծնողներն ու հարազատներն այսօր ԱԺ-ում փակ հանդիպում են ունենալու պաշտպանության և անվտանգության մշտական հանձնաժողովի նախագահ Անդրանիկ Քոչարյանի հետ, այս մասին Factor.am-ին տեղեկացրեց 44-օրյա պատերազմում անհետ կորած զինծառայող Սարգիս Ղուկասյանի հորեղբայրը՝ Արսեն Ղուկասյանը։ Նրա փոխանցմամբ՝ նախնական տվյալներով, հանդիպմանը մասնակցելու է սահմանափակ թվով՝ 16 ծնող, որպեսզի հարցերը համակարգված ուղղելու հնարավորություն լինի:
Արսեն Ղուկասյանը նաև ասաց, որ իրենք պահանջում են, որպեսզի հանդիպմանը ներկա լինեն նաև Ազգային անվտանգության ծառայության ղեկավարը, Գլխավոր դատախազը, Քննչական կոմիտեի ղեկավարը, ինչպես նաև պետական գերատեսչությունների այլ ղեկավարներ։
Անհետ կորած զինծառայողի հարազատի խոսքով՝ այժմ իրենց հայտնի չէ, թե իրավապահ կառույցների ղեկավարներից ովքեր կմասնակցեն փակ հանդիպմանը։
Հիշեցնենք, որ Ամանորից առաջ՝ դեկտեմբերի 27-ին, անհետ կորած զինծառայողների հարազատները փակել էին Բաղրամյան պողոտան և հանդիպում էին պահանջում Անդրանիկ Քոչարյանի հետ։ Բողոքի ակցիայի մասնակից անհետ կորած զինծառայողների ծնողներին ընդունել էր ԱԺ նախագահ Ալեն Սիմոնյանը։
ԱԺ խոսնակը հայտնել էր, որ կլինեն խորհրդարանական լսումներ, կհրավիրվեն նաև համապատասխան գերատեսչություններից իրավասու պաշտոնյաներ, և անհետ կորածների հարազատներին հուզող հարցերը կդառնան քննարկման առարկան։
Հունվարի 10-ին էլ անհետ կորած զինծառայողների ծնողներն ու հարազատները հանդիպել էին ԱԺ պաշտպանության և անվտանգության մշտական հանձնաժողովի նախագահ Անդրանիկ Քոչարյանի հետ։
Մանյա Պողոսյան
