Տնտեսություն
29.01.2025 | 12:34
Նիկոլ Փաշինյանի կառավարությունը մտադիր է «Բարգավաճ Հայաստան» կուսակցության նախագահ Գագիկ Ծառուկյանի որդու՝ միջազգային հետախուզման մեջ գտնվող Նվեր Ծառուկյանին պատկանող ընկերությանը արտոնություն տալ։ Այս հարցն ընդգրկված է վաղվա՝ հունվարի 30-ի կառավարության նիստի չզեկուցվող հարցերի փաթեթում։
Կառավարությունը որոշել է բավարարել «Մուլտի տրանսպորտ» ՍՊԸ-ի կողմից ներկայացված հայտը գերակա ոլորտում իրականացվող ներդրումային ծրագրի շրջանակներում ներմուծվող տեխնոլոգիական սարքավորումների և նյութերի նկատմամբ մաքսատուրքից ազատելու արտոնությունից օգտվելու համար։ Իսկ մաքսատուրքից ազատման արտոնությունը գնահատվում է 64․7 մլն դրամ:
Ըստ կառավարության հիմնավորման՝ «Մուլտի տրանսպորտ» սահմանափակ պատասխանատվությամբ ընկերության կողմից Կոտայքի մարզի միասնական երթուղային ցանցի սպասարկման բարելավման նպատակով նախատեսվում է ներմուծել 32 հատ միկրոավտոբուս։ Ծրագրի շրջանակներում նախատեսվում է իրականացնել 380․8 մլն դրամի ներդրում միկրոավտոբուսների ձեռքբերման համար։
Նշվում է, որ ընկերությունը ներկայումս 409 աշխատատեղ ունի։ Նախատեսվում է ներդրումային ծրագրի շրջանակներում մինչև 2027 թվականը ընկած ժամանակահատվածում աշխատատեղերի թիվը հասցնել մինչև 760-ի՝ 159 հազար դրամ միջին ամսական աշխատավարձով։ Արտոնություն ստանալու համար ներկայացված ապրանքների արժեքը կազմում է 380․8 մլն դրամ:
Տեղեկացնենք, որ «Մուլտի տրանսպորտ» ընկերությունը հիմնադրվել է 2021 թվականին, որը սպասարկում է Կոտայքի մարզում հանրային տրանսպորտի երթուղիները։
Իրավաբանական անձանց պետական ռեգիստրի տվյալներով՝ «Մուլտի տրանսպորտ» ընկերության 100 % բաժնետերը Գագիկ Ծառուկյանի որդի Նվեր Ծառուկյանն է։
Ավել վաղ Գլխավոր դատախազությունը հաղորդագրություն էր տարածել, ըստ որի՝ Նվեր Ծառուկյանի նկատմամբ միջազգային հետախուզում է հայտարարվել։
Մանյա Պողոսյան
