12.01.2026 | 20:03
Ինչ իրավիճակ է ճանապարհներին 20:00-ի դրությամբ
Որ երկրներն է ՀՀ-ն դիտարկում որպես ցորենի ներմուծման այլընտրանքային ուղղություններ․ նախարարության պարզաբանումը
Տնտեսություն
28.01.2025 | 11:28
ՀՀ էկոնոմիկայի նախարարությունը հստակ չի նշում այն երկրների անունները, որոնք Հայաստանը դիտարկում է որպես ցորենի ներմուծման այլընտրանքային ուղղություն։ Factor.am-ի գրավոր հարցմանն ի պատասխան նախարարությունից պարզաբանել են, որ Հայաստանը ոչ միայն ցորենի, այլև պարենային անվտանգության տեսակետից ինքնաբավության ցածր մակարդակ ունեցող մյուս ապրանքների համար որպես ներմուծման այլընտրանք դիտարկում է բոլոր այն երկրները, որոնք հանդիսանում են տվյալ ապրանքների արտահանող երկրներ և պատրաստ են համագործակցել մեր երկրի հետ։
«Այդ նպատակով ուսումնասիրվել են այդ ապրանքների ձեռքբերման գներն ըստ երկրների, տեղափոխման լոգիստիկ ծախսերը և երթուղիները»,- ընդգծել են գերատեսչությունից։
Հիշեցնենք՝ ԱԺ մշտական հանձնաժողովների համատեղ նիստում Էկոնոմիկայի նախարար Գևորգ Պապոյանը 2025 թվականի պետական բյուջեի մասին օրենքի նախագծի նախնական քննարկումների ժամանակ հայտնել էր, որ Հայաստանը ցորենի ներմուծման այլընտրանքային աղբյուրներ է դիտարկում՝ այդ հարցը քննարկելով մի քանի երկրների հետ։
«Այլընտրանքային ներմուծման աղբյուրները դիտարկում ենք: Քննարկում ենք մի քանի երկրների հետ: Ընդ որում՝ սա որևէ երկրի դեմ չէ: Եթե մենք մեր ցորենի 99 տոկոսը ներմուծեինք, պայմանական, Ռումինիայից, ես Ռուսաստանի հետ բանակցելու էի ցորենի ներմուծման հարցով։ Սա նորմալ, տրամաբանական գործընթաց է»,- հայտարարել էր Պապոյանը։
Մանյա Պողոսյան
