Անկարայում ՀՀ-Թուրքիա հարաբերությունների կարգավորման, սահմանի բացման վերաբերյալ Կարսի ներկայացուցիչների հետ հանդիպում է տեղի ունեցել

Անկարայում Թուրքիա-Հայաստան հարաբերությունների կարգավորման գործընթացի շրջանակում հանդիպում է անցկացվել Կարսի Առևտրարդյունաբերական պալատի ներկայացուցիչների հետ։ Թուրքական լրատվամիջոցների հաղորդմամբ՝ հանդիպմանը մասնակցել են Հայաստան-Թուրքիա հարաբերությունների կարգավորման հարցերով հատուկ ներկայացուցիչ Սերդար Քըլըչը, Թուրքիայի ԱԳՆ Կովկասի և Կենտրոնական Ասիայի գծով բաժնի գլխավոր տնօրենի տեղակալ Այշե Ուզերը, ԱԳՆ ներկայացուցիչներ Արիֆ Էքմեքչին և Օնդեր Ակգյունը, Կարսի Առևտրաարդյունաբերական պալատի խորհրդի նախագահ Քադիր Բոզանը, պալատի մեջլիսի նախագահ Իդրիս Աչայը, խորհրդի այլ անդամներ։

Հանդիպման օրակարգային հիմնական հարցը եղել է Կարսի Աքյաքայում գտնվող «Արևելյան դարպասներ» սահմանային անցակետի բացումը, այս գործընթացի ազդեցությունը Կարսի բնակիչների վրա և դարպասի բացման հնարավոր սոցիալ-տնտեսական հետևանքները տարածաշրջանի համար։

Նշվում է, որ Սերդար Քըլըչը տեղեկություններ է փոխանցել գործընթացում ներկա իրավիճակի և ձեռնարկվելիք քայլերի մասին։

Կարսի Առևտրաարդյունաբերական պալատի խորհրդի նախագահ Քադիր Բոզանը հանդիպման ժամանակ իր ելույթում, մասնավորապես, հայտարարել է․ «Մենք ուշադրությամբ հետևում ենք Ադրբեջանի, Թուրքիայի և Հայաստանի միջև հարաբերությունների կարգավորման գործընթացին և կարծում ենք, որ սահմանային դարպասի բացումը Ադրբեջանի, Թուրքիայի և Հայաստանի միջև առկա խնդիրների լուծումից և հարաբերությունների կարգավորումից հետո մեծ նշանակություն կունենա տնտեսության ու հասարակության համար ոչ միայն Կարսում, այլ ամբողջ տարածաշրջանում»։

Նա նշել է, որ այդ գործընթացը կավելացնի Կարսի առևտրի ծավալը, կնպաստի զբաղվածությունը աճին և կբարձրացնի միջազգային համագործակցությունը։

«Որպես Կարսի Առևտրաարդյունաբերական պալատ՝ մենք աջակցում ենք մեր տարածաշրջանի զարգացմանն ու տնտեսական ներուժի մեծացմանն ուղղված ցանկացած աշխատանքի։ Մենք ամբողջ սրտով հավատում ենք, որ կարգավորման գործընթացը կբերի խաղաղություն, կայունություն և բարգավաճում»,- ասել է Բոզանը։

Թարգմանությունը՝ Էմմա Չոբանյանի