Վեդիի ջրամբարի առաջին լցումը նախատեսված է գարնանը․ ՏԿԵՆ

Վեդիի ջրամբարի շինարարության հիմնական աշխատանքներն ավարտված են, ջրամբարի առաջին լցումը նախատեսվում է այս տարվա գարնանը, այս մասին Factor.am-ի գրավոր հարցմանն ի պատասխան տեղեկացրել են Տարածքային կառավարման և ենթակառուցվածքների նախարարությունից։

Գերատեսչությունից մանրամասնել են, որ այս փուլում կատարվում են ջրամբարի մոտեցնող ճանապարհի ասֆալտապատման, «ՍԿԱԴԱ» համակարգի կարգաբերման և թասի մաքրման աշխատանքները։

««Վեդի» ջրամբարի և ոռոգման համակարգի կառուցում» ծրագրի շրջանակում կառուցվող Վեդի ջրամբարը գտնվում է շինարարության ավարտական փուլում՝ աշխատանքների 99 տոկոսն արդեն կատարված է»,- փոխանցել են ՏԿԵՆ-ից։

Նախարարությունից նաև հայտնել են, որ Վեդիի ջրամբարի կառուցումը հնարավորություն կտա ապահովել շուրջ 3220 հա հողերի անխափան և հուսալի ոռոգումը։

Նշենք, որ շուրջ 60 մլն եվրո արժողությամբ ջրամբարի շինարարությունը սկսվել էր 2017 թվականին և նախատեսվում էր ավարտին հասցնել 48 ամսում՝ 4 տարում։

Ջրամբարի շինաշխատանքների ավարտի վերջնաժամկետը, սակայն, մի քանի անգամ հետաձգվել է։ Նախարարությունից պարզաբանել են, որ Վեդիի ջրամբարի շինարարությունը դանդաղել էր՝ պայմանավորված կորոնավիրուսի համաճարակի, պատերազմական և այլ իրավիճակներով։

Հիշեցնենք, որ անցած տարի օգոստոսի 21-ին Արարատի մարզ այցելության ժամանակ վարչապետ Նիկոլ Փաշինյանը ծանոթացել էր նաև Վեդիի ջրամբարի կառուցման աշխատանքներին։ Փաշինյանն արձագանքել էր՝ «Լավ էլ ջրամբար է դառնում»։

Մանյա Պողոսյան