Տեսանյութեր
09.01.2025 | 16:19Այս պահին իմ ունեցած տեղեկություններով՝ Բարձր տեխնոլոգիական արդյունաբերության նախարարությունից հայկական արբանյակին առնչվող քրեական վարույթի շրջանակներում հարցաքննվածներ չկան, այս մասին տարեկան ամփոփիչ ասուլիսի ժամանակ ասաց ԲՏԱ նախարար Մխիթար Հայրապետյանը։
Նրա խոսքով՝ 8 միլիոն դոլարից բացի, հայկական արբանյակի վրա այլ ծախսեր չեն արվել։
«Դրա շրջանակներում 2022-ին ձեռք է բերվել արբանյակը և այդ բյուջեի շրջանակում կառուցվել է երկնային կայանը, որը ոչ միայն ծառայում է «Հայասաթ-1»-ին, այլև ընդհանրապես բոլոր այն արբանյակներին, որոնք ՀՀ-ն ձեռք կբերի, ապագայում նաև կկառուցի»,-ասաց նա։
Նախարարի խոսքով՝ մեծ ծավալի լուսանկարահանումներ են արվել արբանյակի կողմից վերջին երկու տարիների ընթացքում։ Իսկ թե ինչ նպատակով են օգտագործվել՝ չի ասի ո՛չ հիմա, ո՛չ էլ ապագայում՝ պնդելով, որ բնականաբար դրանք օգտագործվել են։
«Այն պարամետրերը, որոնք նշված են եղել ձեռք բերվելիս, այդ պարամետրերով էլ գնումը կատարվել է։ Դրանք աշխարհում լավագույնը չեն կարող համարվել, բայց ՀՀ-ն առաջին քայլն է անում տիեզերական ոլորտում իր տեղն ունենալու և կարողություններ ու գիտելիքներ հավաքագրելու համար»,-ընդգծեց Հայրապետյանը։
Հայրաետյանի համար հասկանալի չէ, թե ինչո՞ւ արբանյակը Հայաստանին վաճառած իսպանական ընկերության ներկայացուցիչները պետք է տեղեկացված լինեն, թե արբանյակի նկարահանումներն ինչ նպատակով են օգտագործվում։ Նա միայն պատասխանեց, որ արբանյակի լուսանկարները գաղտնի են, թե ինչ նպատակով են արվել, իսպանական կողմի գործը չէ։
Հիշեցնենք՝ ըստ լրատվամիջոցների՝ իսպանական կողմի ներկայացուցիչները հայտարարել էին, որ արբանյակն Ադրբեջանի հետ սահմանազատման-սահմանագծման գործընթացում են օգտագործվում։
Մանրամասները՝ տեսանյութում։
