Հայաստանը չի կարող միաժամանակ լինել ԵՄ ու ԵՏՄ անդամ․ Պեսկով

Կրեմլը հայտարարել է, որ Հայաստանի հնարավոր անդամակցությունը Եվրամիությանը նրա ինքնիշխան իրավունքն է, սակայն երկու տարբեր միջազգային կազմակերպությունների անդամ լինելն անհնար է, գրում է Ինտերֆաքսը։

«Ի՞նչ է նշանակում ԵՄ-ին անդամակցությունը, հիմա դժվար է ասել, քանի որ երկու տարբեր կազմակերպությունների անդամ լինելը տեսականորեն անհնար է։ Իհարկե, դա Հայաստանի ինքնիշխան իրավունքն է։ Մենք գիտենք, որ ԵՏՄ-ին անդամակցությունը շահեկան է»,- ասել է ՌԴ նախագահի մամուլի խոսնակ Դմիտրի Պեսկովը՝ պատասխանելով Եվրամիությանը Հայաստանի անդամակցության հեռանկարների վերաբերյալ Մոսկվայի դիրքորոշման մասին լրագրողների հարցին։

Նշելով, որ հենց Եվրամիությունն է նախաձեռնում այս կազմակերպությանը Հայաստանի անդամակցության գործընթացը, ՌԴ նախագահի խոսնակն ասել է․ «Դեռ պետք է հասկանանք, թե Եվրամիությունն ինչ դիրքորոշում ունի այս հարցում։ Մենք լավ գիտենք Թուրքիայի օրինակը, որը տասնամյակներ շարունակ պահպանել է իր կողմնորոշումը դեպի ԵՄ-ին անդամակցություն, սակայն Բրյուսելի կողմից մեծ փոխադարձության չի հանդիպում»։

Ըստ Պեսկովի՝ «իրականում  պետք է ելնել այն աշխատանքային մեխանիզմներից, ինտեգրացիոն ձևաչափերից, որոնք արդեն ապացուցել են իրենց կենսունակությունը, որոնք շարունակում են աշխատել՝ ի շահ դրանց մասնակից ժողովուրդների և երկրներիվ:

Անդրադառնալով ԵՏՄ-ին անդամակցությունից Երևանի ստացած առավելությունների մասին հարցին՝ Կրեմլի խոսնակն ասել է, թե «իրերն իրենց անուններով կոչելով՝ սա շատ  դրական դիվիդենտներ է տալիս Հայաստանին՝ որպես պետություն և այդ երկրի ժողովրդին»։

«Դա իրականում չափվում է տոկոսներով, աճի տեմպերով՝ պայմանավորված ԵՏՄ-ին անդամակցությամբ և այլն»,- ասել է Պեսկովը։

Հիշեցնենք, որ ՀՀ Կառավարությունն այսօրվա նիստում հավանություն տվեց «Եվրոպական Միությանը Հայաստանի Հանրապետության անդամակցելու գործընթացի մեկնարկի մասին» ՀՀ օրենքի նախագծին:

Թարգմանությունը՝ Էմմա Չոբանյանի