«Զանգեզուրի միջանցք»-ը պետք է բացվի և կբացվի․ Ալիևը դարձյալ սպառնացել է՝ ՀՀ-ն «ֆաշիստական պետություն» անվանելով

Ադրբեջանի նախագահ Իլհամ Ալիևը տեղական հեռուստաալիքներին տված հարցազրույցում դարձյալ խոսել է, այսպես կոչված, «Զանգեզուրի միջանցք»-ից և սպառնալիքներ հնչեցրել։ Ալիևը նախ անդրադարձել է ԱՄՆ-ում ընտրությունների արդյունքներին և հայտարարել, թե «ավարտվել է նաև Սորոսի դարաշրջանը»՝ ակնարկելով Բայդենի վարչակազմին։

Ալիևը նշել է, թե Հայաստանի ղեկավարությունը պետք է դա հաշվի առնի։

«Պետք է հաշվի առնեն, որ Մերձավոր Արևելքում նրանց մերձավոր դաշնակցի՝ Ասադի բռնապետությունն արդեն նետվել է պատմության աղբանոցը, և դա շարունակվելու է, ուստի թող ճիշտ քայլ անեն։ Ադրբեջանը նրանց համար վտանգի աղբյուր չէ։ Մենք խաղաղություն և համագործակցություն ենք ուզում Հարավային Կովկասում, և թող մեզ չխանգարեն։ Նրանք չպետք է գործեն որպես աշխարհագրական պատնեշ Թուրքիայի ու Ադրբեջանի միջև։ «Զանգեզուրի միջանցքը» պետք է բացվի և կբացվի։ Ինչքան շուտ նրանք դա հասկանան, այնքան լավ»,- սպառնացել է Ալիևը։

Բացի այդ ՝ Ալիևը անդրադարձել է նաև ՀՀ-ի կողմից զենքի գնումներին՝ հայտարարելով, թե դա նոր լարվածության կբերի։
«Մենք դա չենք ուզում, մենք խաղաղություն ենք ցանկանում»,- ասել է Ադրբեջանի նախագահը՝ թեզ առաջ քաշելով, թե, իբր, «Հայաստանն իրականում սպառնալիքի աղբյուր է տարածաշրջանի համար և անկախ հայկական պետությունն, ըստ էության, ֆաշիստական պետություն է»։
«Քանի որ այդ երկիրը մոտ 30 տարի ղեկավարել են ֆաշիստական գաղափարախոսության կրողները, նրանք այս երկիրը կերտել են իրենց կերպարով։ Ադրբեջանը հարևան է ֆաշիստական պետությանը, և ֆաշիզմի վտանգը չի վերացել։ Հետևաբար՝ ֆաշիզմը պետք է ոչնչացվի։ Այն կոչնչացնի կամ Հայաստանի ղեկավարությունը կամ մենք։ Մենք այլ ելք չունենք»,- հայտարարել է Ալիևը՝ նշելով, թե Հայաստանը պետք է անհապաղ դադարեցնի սպառազինումը։
«Ֆրանսիան ու նրան զենք մատակարարող այլ երկրները պետք է չեղարկեն այդ պայմանագրերը։ Արդեն Հայաստան առաքված զենքերը պետք է վերադարձվեն։ Սա է մեր պայմանը»,-ասել է Ադրբեջանի նախագահը։

Թարգմանությունը՝ Էմմա Չոբանյանի