Ո՞վ կպատկերացներ․ Ֆրանսիան ենթարկվել է անընդունելի միջամտության, քանի որ մենք պաշտպանում ենք միջազգային իրավունքը և Հայաստանը․ Մակրոն

Ֆրանսիայի նախագահ Էմանուել Մակրոնը Ֆրանսիայում հավատարմագրված դեսպանների հետ  հանդիպմանն անդրադարձել է  աշխարհում տեղի ունեցող փոփոխություններին։ «Ո՞վ կպատկերացներ․․․ Ֆրանսիան ենթարկվել է անընդունելի միջամտության Նոր Կալեդոնիայում Ադրբեջանի կողմից, որը մտածում էր այնտեղ լուծել իր անըմբռնելի սխալները, քանի որ մենք պաշտպանում ենք միջազգային իրավունքը և Հայաստանը։ Ո՞վ կպատկերացներ դա։ 10 տարի առաջ, եթե մեզ ասեին, որ աշխարհի ամենամեծ սոցիալական ցանցերից մեկի սեփականատերը կաջակցի նոր միջազգային շարժմանը և ուղղակիորեն կմիջամտի ընտրություններին, այդ թվում՝ Գերմանիայում, ո՞վ կպատկերացներ դա։ Սա այն աշխարհն է, որտեղ մենք ապրում ենք, և որտեղ մենք պետք է դիվանագիտություն բանեցնենք»,- հայտարարել է Ֆրանսիայի նախագահը։

«Եվ այսպես, վտանգված է միջազգային կարգի և այս կանոնների վստահելիությունը: Բայց ամենից առաջ այն պատճառով, որ վերջին տարիներին Ռուսաստանը ավելացրել է իր ագրեսիվությունը, ինչպես նաև փոխել է իր ագրեսիվության բնույթը եվրոպացիների և մոլորակի մի մեծ մասի նկատմամբ: Վարքագծի արմատական ​​այս փոփոխությունը տեղի է ունեցել միջուկային դոկտրինի առումով, որը Մոսկվան մեծապես խստացրել է իր հարևաններին սպառնալու համատեքստում: Սա  նոր չէ, քանի որ վերջին տասնամյակների ընթացքում մենք տեսել ենք լարվածության աճ: Այժմ դա շատ ավելի պարզ է, շատ ավելի հստակ:  Ռուսաստանը, կտրուկ փոխելով իր դաշնակցային հարաբերությունները Հայաստանի հետ, աջակցեց Ադրբեջանի գործողություններին, քանի որ առաջին անգամ Հայաստանն ունեցավ խիզախ վարչապետ, որը դեմ կանգնեց  իրեն։ Վրաստանում  ՌԴ-ն իրադրությունն ակնհայտորեն ապակայունացրեց ու կեղծ ընտրական գործընթաց եղավ։ Մոլդովայում նա նույն բանը փորձեց, սակայն ձախողվեց։ Եվ ես ողջունում եմ նախագահ Մայա Սանդուի քաջությունն ու վճռականությունը: Մեզ մնում է հավաքականորեն զգոն լինել մի քանի ամսից սպասվող խորհրդարանական ընտրությունների հարցում»,- մասնավորապես ասել է Մակրոնը։

Թարգմանությունը՝ Անահիտ Խաչատրյանի