Արշակ Կարապետյանը երեկ Մոսկվայում բերման է ենթարկվել, ապա ազատ արձակվել. ՆԳՆ խոսնակ

ՀՀ ՆԳՆ ոստիկանության Քրեական ոստիկանության գլխավոր վարչությունում ստացված տեղեկության համաձայն` պաշտպանության նախկին նախարար Արշակ Կարապետյանը դեկտեմբերի 29-ին հայտնաբերվել և բերման է ենթարկվել ՌԴ Մոսկվա քաղաքի Տվերսկոյ շրջանի ոստիկանության բաժնի աշխատակիցների կողմից, ապա ազատ արձակվել։ Այս մասին Factor.am-ին տեղեկացրեց ՆԳՆ մամուլի խոսնակ Նարեկ Սարգսյանը:

Նրա փոխանցմամբ՝ Արշակ Կարապետյանը 05.12.2024 թվականից ՀՀ ՆԳՆ ոստիկանության ՔՈԳՎ-ի կողմից ՀՀ նախկին քրեական օրենսգրքի 310-րդ, 308-րդ հոդվածի 1-ին մասի, 38-308-րդ հոդվածի 1-ին մասի և 38-375-րդ հոդվածի 1-ին մասի մեղադրանքներով հետախուզվում է, իսկ որպես խափանման միջոց ընտրված է բացակայելու արգելքը: Նարեկ Սարգսյանը հավելեց, որ Կարապետյանի նկատմամբ հայտարարված է նաև միջպետական հետախուզում:

Նշենք, որ ռուսական «Իզվեստիա»-ն, հղում անելով սեփական աղբյուրներին, հաղորդել էր, որ Մոսկվայում ձերբակալվել է ՀՀ պաշտպանության նախկին նախարար Արշակ Կարապետյանը։

Հաղորդվում էր, որ Կարապետյանին բերման են ենթարկել Մոսկվայի Տվերսկայա փողոցից։

Ավելի վաղ պաշտպանության նախկին նախարար Արշակ Կարապետյանը հայտարարել էր «քաղաքականություն մտնելու և ազատագրական շարժում սկսելու» մասին:

Հիշեցնենք, որ Արշակ Կարապետյանը ՀՀ պաշտպանության նախարար էր նշանակվել 2021 թվականի օգոստոսի 2-ին և պաշտոնից ազատվել նույն թվականի նոյեմբերին:

Կարապետյանը մինչև 2016-ը եղել է ՀՀ Զինված ուժերի գլխավոր շտաբի հետախուզության վարչության պետը։ Ապրիլյան քառօրյա պատերազմից հետո՝ ապրիլի 26-ին, նա երեք բարձրաստիճան զինվորականների թվում էր, որոնք Սերժ Սարգսյանի հրամանագրերով ազատվել էին պաշտոնից։ 2018-ի դեկտեմբերին Արշակ Կարապետյանը նշանակվել էր վարչապետ Նիկոլ Փաշինյանի խորհրդական։