Ինչու է քաղաքապետարանը խոչընդոտել Factor TV-ի լրագրողի մուտքը Ավինյանի մամուլի ասուլիսին

Տիգրան Ավինյանը տարեվերջյան ամփոփիչ ասուլիս է հրավիրել քաղաքապետարանում: Factor TV-ի նկարահանող խմբին` լրագրողին և օպերատորին, չթույլատրեցին լուսաբանել ասուլիսը՝ պատճառաբանելով, որ Ավինյանը հրավիրել է լրատվամիջոցների գլխավոր խմբագիրներին:

Մեր հարցին` ինչո՞ւ չենք կարող լուսաբանել, լրատվության վարչության պետի պաշտոնակատար Տարոն Գևորգյանն ասաց` տեղյակ չէ, կճշտի՝ կասի, բայց վերելակով վերև բարձրացավ և այդպես էլ ներքև չիջավ: Իսկ քաղաքապետի մամուլի քարտուղար Հայկ Կոստանյանը հեռախոսազանգերի չպատասխանեց: Նշենք, որ մի քանի օր առաջ քաղաքապետի մամուլի խոսնակը ասուլիսի լուսաբանման հրավեր էր ուղարկել Factor TV-ի էլեկտրոնային փոստին՝ հետևյալ բովանդակությամբ:

«Դեկտեմբերի 26-ին՝ ժամը 16:30-ին Ձեր լրատվամիջոցի գլխավոր խմբագրին սիրով հրավիրում ենք Երևանի քաղաքապետի ամփոփիչ մամուլի ասուլիսին։ Կխնդրեմ քաղաքապետարանում լինել ասուլիսից 15 րոպե շուտ»:

Այս հրավերը ենթադրում էր, որ ասուլիսը պետք է լուսաբանվեր մեր գլխավոր խմբագրի կողմից։ Մինչդեռ մեր խմբագրությունում մամուլի ասուլիսները լուսաբանում են լրագրողները, իսկ գլխավոր խմբագիրն այլ գործառույթներ ունի։ Մեր տեղեկություններով` նախքան ասուլիսը լրատվամիջոցների գլխավոր խմբագիրների հետ կարճատև փակ հանդիպում է եղել, ինչից հետո մեկնարկել է ասուլիսը, որին, փաստորեն, մասնակցելու հնարավորություն է ընձեռնվել այն լրատվամիջոցների լրագրողներին, որոնց գլխավոր խմբագիրները մասնակցել են Ավինյանի հետ փակ հանդիպմանը։ Այժմ Factor TV-ն վերահեռարձակում է քաղաքապետարանի ուղիղ ազդանշանը՝ առանց հարցեր տալու հնարավորության։

Նշենք, որ սա աննախադեպ է, երբ համայնքային իշխանությունը ասուլիս է կազմակերպում և հրավերն ուղղվում է անձնապես ԶԼՄ-ի գլխավոր խմբագրին և չմասնակցելու դեպքում խոչընդոտելով նույն լրատվամիջոցի լրագրողի ներկայությունը և, փաստորեն, սահմանափակելով ասուլիսում հարցեր ուղղելու հնարավորությունը։

Արփի Հակոբյան