17.07.2026 | 23:30
ԲԸՏՄ-ում քննարկվել են COP17-ի նախապատրաստական աշխատանքներն ու տեսչության մասնակցությունը
ԱԳՆ-ն՝ Ալիևի 300,000 ադրբեջանցիների Հայաստան վերադարձի հայտարարության մասին
Քաղաքականություն
24.12.2024 | 13:01
ՀՀ ԱԳՆ-ն ուղիղ չի պատասխանում՝ արդյոք Ադրբեջանը Հայաստանի Հանրապետությանը պաշտոնապես դիմել է շուրջ 300,000 ադրբեջանցիների վերադարձի համար։ Factor.am-ի գրավոր հարցին ի պատասխան արտագործնախարարությունից արձագանքել են, որ մեր բարձրացրած հարցադրումներին վարչապետ Նիկոլ Փաշինյանն անդրադարձել է դեկտեմբերի 19-ին Արմենպրեսին տված հարցազրույցում։
Փաշինյանն այդ հարցազրույցում մասնավորապես ասել է․ «Այսպես կոչված «Արևմտյան Ադրբեջանի» խոսույթով պաշտոնական Բաքուն ցանկանում է առարկայացնել Հայաստանի Հանրապետության նկատմամբ ունեցած տարածքային պահանջները, որոնք արձանագրված են Ադրբեջանի Սահմանադրության մեջ։
Եթե այդպես չէ, ու մենք մեր ընկալումներում սխալվում ենք, ուրեմն Արեւմտյան Ադրբեջան ասելով պետք է հասկանալ Ադրբեջանական Հանրապետության Ղազախի, Թովուզի, Աղստաֆայի, Գեդաբեյի, Դաշքեսանի, Քելբաջարի, Լաչինի, Կուբաթլուի, Զանգելանի շրջանները:
Հետևաբար՝ մարդկանց վերադարձը այնտեղ Ադրբեջանի ներքին գործն է, եւ Հայաստանի Կառավարությունն այստեղ անելիք ու քննարկելիք չունի, բացի այն հարցերից, որ արդեն քննարկում է Ադրբեջանի հետ: Նկատի ունեմ՝ բնականոն հարաբերությունների հաստատումը, որոնք կապահովեն, այդ թվում, Ադրբեջանի արեւմտյան եւ Հայաստանի արեւելյան սահմանների անվտանգությունը»։
Հիշեցնենք՝ Ադրբեջանի նախագահ Իլհամ Ալիևը ВГТРК-ին և ՌԻԱ Նովոստիին տված հարցազրույցում հայտնել էր, որ շուրջ 300,000 ադրբեջանցի պաշտոնապես դիմել է Հայաստանի ղեկավարությանը, որպեսզի իրենց վերադարձի, վերաինտեգրման համար պայմաններ ստեղծվեն: Ըստ նրա՝ խոսքը 1980-1990-ականներին Հայաստանից հեռացած ադրբեջանցիների մասին է:
«Նրանք վերադառնալու իրավունք ունի: Հայաստանի ղեկավարությունից դեռ պատասխան չենք ստացել, թե ինչպես են տեսնում ադրբեջանցիների՝ «իրենց պատմական հողեր» վերադառնալու գործընթացը»,- նշել է Ալիևը։
Մանյա Պողոսյան
