Ես ինքս էլ ապշած էի. որոշել եմ փոխհատուցել ԱՄՆ մեկնելու ավիատոմսի գումարը. Ավինյան․ ՏԵՍԱՆՅՈՒԹ

«ԱՄՆ կատարած այցից հետո տեղեկացա, թե ինչ գներով են ինձ համար ձեռք բերվել  տոմսերը, և, անկեղծ ասած՝ ես ինքս էլ մի փոքր ապշած էի այդ թվերից, հետո մի փոքր խորացա և հասկացա, որ ընդհանուր անպատասխանատվության և անտարբերության որոշակի խնդիր կա այստեղ, որովհետև նոյեմբերի 22-ի այցի համար ավիատոմսերը ձեռք են բերվել նոյեմբերի 20-ին, և եթե մեկ օր ուշացումով էլ ձեռք բերեինք, հնարավոր է՝ կրկնակի կամ եռակի թանկ գնեինք։ «Որոշում եմ կայացրել այդ ծախսն ամբողջապես փոխհատուցել ինքնուրույն։ Նաև կանխելով հետագա հարցերը, թե ինչ գումարներով, կառաջարկեմ իմ հայտարարագիրը ուսումնասիրել»,- այս մասին Երևանի քաղաքապետարանի գործակարգավարական նիստում հայատարարեց Երևանի քաղաքապետ Տիգրան Ավինյանը։

Հիշեցնենք՝ Factor TV-ն գրել էր, որ Երևանի քաղաքապետ Տիգրան Ավինյանի գլխավորած պաշտոնական պատվիրակությունը նոյեմբերի 23-30-ը գործուղվել էր Ամերիկայի Միացյալ Նահանգներ։ Քաղաքապետարանը 9 ավիատոմս է ձեռք բերել՝ 12 միլիոն 465 հազար դրամով։ Ավիատոմսերից 8-ը էկոնոմ դասի են եղել, 1-ը՝ բիզնես դասի, որն արժեցել է 7 միլիոն 650 հազար դրամ։ Բիզնես դասի ավիատոմսով ԱՄՆ էր մեկնել պատվիրակությունը գլխավորած Երևանի քաղաքապետ Տիգրան Ավինյանը։

Ինչո՞ւ էր Ավինյանը մեկնել բիզնես դասի ավիատոմսով, Factor TV-ի գրավոր հարցմանն ի պատասխան քաղաքապետարանից հայտնել էին․ «Հիմք ընդունելով իրավական կարգավորումները՝ ձեռք է բերվել բիզնես դասի 1 ավիատոմս»։

Թե իրավական ո՞ր կարգավորումների մասին է խոսքը՝ քաղաքապետարանից չէին հայտնել։

Դեկտեմբերի 18-ին Factor TV-ի տաղավարում կայացած Ավինյան-Մարության բացառիկ բանավեճի ժամանակ շուրջ 20 հազար ԱՄՆ դոլար արժողությամբ ավիատոմսի առնչությամբ Մարությանը հայտարարել էր, որ Ավինյանի՝ Լոս Անջելես մեկնելու տոմսի արժեքը այնքան է եղել, որքան Ավան վարչական շրջանի 9 հարկանի 43 շենքի բնակչի 1 տարվա գույքահարկը։

Ավինյանը պատասխանել էր, որ սխալվել են, բայց ինքը չի զբաղվել այդ գնումով։ Եվ ստացվում է՝ Ավինյանը տոմսի գումարի փոխհատուցման մասին  հայտարարություն է անում Factor TV-ում տեղի ունեցած բանավեճից հետո։

Արփի Հակոբյան