Բաքվում պահվող Արցախի ռազմաքաղաքական ղեկավարների դեմ հարուցված շինծու քրգործերը փոխանցվել են դատարանին

Բաքվում ապօրինաբար պահվող Արցախի ռազմաքաղաքական ղեկավարների ու այլ պաշտոնյաների նկատմամբ հարուցված շինծու քրեական գործերը փոխանցվել են դատարանին։ Տեղեկությունը տարածել է Ադրբեջանի Գլխավոր դատախազության մամուլի ծառայությունը։

Նշվում է, որ քրեական գործով մեղադրական եզրակացությունը հաստատվել է գլխավոր դատախազի կողմից 2024 թվականի դեկտեմբերի 16-ին և դիտարկման համար ուղարկվել Բաքվի զինվորական դատարան։

Դատարանը քննելու է 15 անձի նկատմամբ գործ՝ ընդհանուր 2548 դրվագով։ Նշվում է, թե Ադրբեջանի Գլխավոր դատախազության քննչական վարչությունը քրեական հետաքննություն է անցկացրել, իբր, «Ադրբեջանի Հանրապետության և նրա ժողովրդի դեմ կատարված ագրեսիայի, օկուպացիայի, ցեղասպանության, խաղաղության և մարդկության դեմ ուղղված այլ հանցագործությունների, ռազմական հանցագործությունների, ահաբեկչության և ահաբեկչության ֆինանսավորման հատկանիշներով և շատ այլ հանցագործությունների» դրվագներով։

2024 թվականի մայիսին, Ադրբեջանի գլխավոր դատախազի որոշմամբ, 1987-ից 2024 թվականներին տարբեր քննչական մարմինների կողմից քննված 1389 քրեական գործ միավորվել է մեկ վարույթում։

Նշվում է, որ այդ 15 անձինք են՝ Արկադի Ղուկասյանը, Արայիկ Հարությունյանը, Բակո Սակահյանը, Դավիթ Իշխանյանը, Դավիթ Բաբայանը, Լևոն Մնացականյանը, Դավիթ Մանուկյանը, Գարիկ Մարտիրոսյանը, Մելիքսեթ Փաշայանը, Դավիթ Ալահվերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Վասիլ Բեգլարյանը, Էրիկ Ղազարյանը։ Նրանց նկատմամբ գործեր են հարուցվել Ադրբեջանի Քրեական օրենսգրքի 100, 102, 105, 106, 107, 110, 112, 113, 114, 115, 116, 118, 120, 192, 214, 214-1, 218, 221, 228, 227, 270 հոդվածներով։

«Ղեկավարվելով սույն քննչական գործով մատնանշված դրվագներով բազմաթիվ անձանց՝ Հայաստանի Հանրապետության տարածքում գտնվելու լուրջ հիմքերով, Ադրբեջանի Գլխավոր դատախազությունը համագործակցության է հրավիրում ՀՀ պատկան մարմիններին»,- ասվում է ադրբեջանական կողմի հաղորդագրության մեջ։

Թարգմանությունը՝ Էմմա Չոբանյանի