Բանջարեղենն ու ձուկը թանկացել են․ որ ապրանքների գնաճն է նոյեմբերին եղել ամենաբարձրը

Այս տարվա նոյեմբերին նախորդ տարվա նույն ամսվա համեմատ հանրապետությունում սննդամթերքն ու ոչ ալկոհոլային խմիչքը թանկացել են 1.7%-ով, իսկ այս տարվա հոկտեմբերի համեմատ՝ 3.1%-ով: 

Այսպիսով՝ 1 ամսում թանկացել են հետևյալ ապրանքախմբերը․ 

• Բանջարեղեն՝ 22 %-ով
• Ձուկ և ծովամթերք՝ 3․7%-ով
• Յուղեր և ճարպեր՝ 3․4 %-ով
• Սուրճ, թեյ և կակաո՝ 2 %-ով
• Միրգ՝ 1․1 %-ով
• Օղի, գարեջուր՝ 0․8 %-ով
• Հացաբուլկեղեն և ձավարեղեն՝ 0․5 %-ով

Ընդհանուր առմամբ՝ այս ապրանքատեսակները թանկացել են նաև նախորդ տարվա նույն ամսվա համեմատ։ Բանջարեղենը 1 տարվա ընթացքում թանկացել է 8․1 %-ով, ձուկ և ծովամթերքը՝ 5 %-ով, յուղերն ու ճարպերը՝ 3 %-ով, միրգը՝ 3 %-ով, օղին՝ 10․2 %-ով, գարեջուրը՝ 3․7 %-ով։

Բանջարեղենից անցած տարվա նոյեմբերի համեմատ ամենաշատը թանկացել են․

• Սմբուկը՝ 50 %-ով
• Վարունգը՝ 30 %-ով
• Խառը կանաչեղենը՝ 43 %-ով
• Սխտորը՝ 23 %-ով
• Ծաղկակաղամբը, բրոկոլին՝ 12%-ով

Մրգերից 1 տարում առավելապես թանկացել են․

• Ելակը՝ 37․2%-ով
• Մանդարինը՝ 12․1 %-ով
• Նարինջը 11․4 %-ով
• Ծիրանը՝ 10․1 %-ով
• Տանձը՝ 8 %-ով
• Նուռը՝ 5 %-ով

2024 թ. նոյեմբերին հոկտեմբերի համեմատ մրգի և բանջարեղենի ապրանքախմբերի միջին կշռված գնաճը կազմել է 13.90%: Վերը նշված ապրանքախմբերը սպառողական զամբյուղում ունենալով 9.04% տեսակարար կշիռ, նշված ժամանակահատվածում նպաստել են սպառողական գների ընդհանուր մակարդակի աճին 1.26 տոկոսային կետով:

2024 թ. նոյեմբերին 2023թ. նոյեմբերի համեմատ ոչ պարենային ապրանքների շուկայում գների մակարդակը նվազել է 2.1%-ով, իսկ 2024 թ. հոկտեմբերի համեմատ արձանագրվել է 0.2% գնաճ:

Բնակչությանը մատուցված ծառայությունների ոլորտում 2024 թ. նոյեմբերին 2023 թ . նոյեմբերի համեմատ սակագներն աճել են 3.0%-ով, իսկ 2024 թ. հոկտեմբերի համեմատ գրանցվել է 0.1% նվազում։

Հետաքրքրական է, որ նոյեմբերին հոկտեմբերի համեմատ նվազում է նկատվել հանգստի կազմակերպման և հյուրանոցային ծառայութունների ոլորտում՝ համապատասխանաբար 5 և 5․6 %-ով։ 

Անժելա Պողոսյան