05.12.2025 | 23:32
ԱԱ․ Բաչկովը հաղթել է ժամկետից շուտ, Մաշակարյանը և Հովհաննիսյանը ևս շարժվում են առաջ
«Տունս փլվեց մեր գլխին, տապչկաներով փախանք»․ կինն ահազանգում է՝ շինարարության պատճառով անտուն է մնացել․ ՏԵՍԱՆՅՈՒԹ
Հասարակություն
06.12.2024 | 20:00
57-ամյա Անուշ Գրիգորյանն արդեն երկու տարի է՝ մի քանի ամիսը մեկ վարձով տնից տուն է տեղափոխվում։ Ասում է՝ ստիպված է․ առանց տանիք է մնացել այս տարվա հունվարին, երբ փլուզվեց Եկմալյան փողոցում գտնվող նրա տունը։
Ինչ իրավիճակ է կիսաքանդ տան ներսում․ Factor TV-ն հնարավորություն չունեցավ ավելի մանրամասն նկարահանումներ իրականացնելու, քանի որ տպավորություն էր, որ այն ամեն վայրկյան կարող է ամբողջությամբ փլվել։
1999 թվականից այս տանն ապրող կնոջ խոսքով՝ թեև շինությունն ավելի քան հարյուրամյա պատմություն ունի, սակայն ամուր էր կառուցված։ Ամեն շաբաթ այստեղ այցելող կինը շաբաթներ առաջ ականատես է եղել իր տան շքամուտքի փոփոխությանը։ Գրիգորյանի խոսքով՝ հարևանությամբ կառուցվող շինությունն իրականում պետք է մեկ հարկանի լիներ, սակայն հիմա պատկերը կտրուկ փոխվել է։ Factor TV-ի նկարահանման պահին ևս շինարարությունն ակտիվ շարունակվում էր։
Կինը պնդում է՝ խնդրի մասին շուրջ 2 տարի չի բարձրաձայնել, քանի դեռ այս տարեսկզբին հանկարծակի փլուզում չի գրանցվել։ Անուշի խոսքով՝ դեպքից հետո շինարարությունն իրականացնող «Էյջ Այ Սի ԴԻԶԱՅՆ» ընկերությունը ներկայացնող Արգամ Հովհաննիսյանն իրեն գումար է տվել և փորձել համաձայնության գալ։
Մեր նկարահանման ժամանակ շինհրապարակ այցելեց նաև Անուշ Գրիգորյանի կողմից հիշատակված Արգամ Հովհաննիսյանը, որը հրաժարվեց որևէ պարզաբանում ներկայացնել՝ պնդելով, թե կինը ստում է, նա պետք է իր ստի մասին պարզաբանում ներկայացնի, ոչ թե ինքը։
Հարցին՝ եթե իրենց շինաշխատանքների հետևանքով չի տունը փլուզվել, ինչո՞ւ է Անուշ Գրիգորյանին 600 հազար գումար տվել, Հովհաննիսյանը նշեց՝ խղճահարությունից դրդված։
Քաղաքապետի մամուլի քարտուղար Հայկ Կոստանյանը փոխանցեց, որ «Էյջ Այ Սի ԴԻԶԱՅՆ» ընկերությանը տրամադրված շինթույլտվության համաձայն՝ այդ տարածքում պետք է լինի 1 հարկանի շինություն՝ առավելագույնը 6 մ բարձրությամբ, ևս մեկ հարկ էլ՝ շինության տակ։
Անդրադառնալով տան փլուզման խնդրին՝ Կոստանյանը նշեց, որ գերատեսչությունն այստեղ որևէ իրավասություն չունի, քանի որ եթե կա շինարարության և փլուզման միջև հաստատված պատճառահետևանքային կապ, նման դեպքերում վնասի ամբողջ պատասխանատվությունը կրում է կառուցապատողը։
Եվ մինչ կողմերը միմյանց հասցեին մեղադրանքներ են հնչեցնում, 57-ամյա կինը շարունակում է որդու հետ մի տանից մյուսը գնալ՝ հույս ունենալով, որ օրերից մի օր կվերադառնա իր տուն։
Մանրամասները՝ տեսանյութում։
Ռոզա Վարդանյան
