16.02.2026 | 00:04
Հայաստանի գեղասահորդները հաջող մեկնարկեցին Օլիմպիական խաղերում․ ՏԵՍԱՆՅՈՒԹ
Ինչո՞ւ դոլարը 1 օրում էժանացավ շուրջ 10 դրամով․ զրույց տնտեսագետի հետ․ ՏԵՍԱՆՅՈՒԹ
Տնտեսություն
06.12.2024 | 18:30
Վերջին երկու շաբաթում դոլարի փոխարժեքի աճից հետո այսօր արդեն նվազում է գրանցվել 7-10 դրամով։ Երեկ դոլարը վաճառվում էր միջինը 407.05 դրամով, ապա այսօր դոլարի միջին գինը 402 դրամ է։
Առքը ՀՀ բանկերում միջինում 392 դրամ է, որը նախորդ օրվա ընթացքում նվազել է շուրջ 4 դրամով։ Վաճառքը փոխանակման կետերում 398-399 դրամ է, ինչև երեկվա փոխարժեքի համեմատ նվազել է 8-9 դրամով։
Տնտեսագետ Հրանտ Միքայելյանի խոսքով՝ այսպիսով կարող ենք ասել, որ փոխարժեքը կայունանում է։
«Այս պահի դրությամբ կարող ենք ասել, որ կայունանում է։ Ընդհանրապես՝ ինչ վերաբերում է դրամի փոխարժեքին, հիմնական տատանումը պայմանավորված է եղել դոլարի նկատմամբ ռուսական ռուբլու տատանումով, որովհետև վերջերս Ռուսաստանի ու ԱՄՆ-ի հարաբերությունները սրվեցին, և նոր պատժամիջոցներ ընդունվեցին, որոնք ազդեցին Ռուսաստանի տնտեսության վրա։ Քանի դեռ Ռուսաստանը չի գտել այս պատժամիջոցների հետ աշխատելու ձևաչափը, դա անմիջապես ազդել է ռուբլու վրա, այն արժեզրկվել է մինչև 110 ռուբլի դոլարի նկատմամբ։ Հիմա ռուբլին մոտավորապես 10 %-ով թանկացավ և 1 դոլարն արժե 100 ռուբլի, դրամն էլ է սկսում թանկանալ, որովհետև պարզ է, որ արժույթի փոխանակումը Ռուսաստանի և Հայաստանի միջև բավականին ինտենսիվ է»,- նշեց տնտեսագետը։
«Կա երկարատև և կարճաժամկետ միտում։ Եթե մենք խոսենք կարճաժամկետ կամ միջնաժամնկետ՝ մինչև կես տարվա համար, ապա քիչ թե շատ կարելի է ակնկալել, որ կայուն է լինելու, որովհետև այն ֆինանսական ցուցանիշները, որ մենք ունենք, միջազգային ռեզերվները Հայաստանի, ԿԲ պահուստի չափը, այս պահի դրությամբ դրանք կայուն են, այստեղ փոփոխություն չկա։ Ավելին՝ կոմերցիոն տրանսֆերտները և արտաքին առևտուրը ևս կայուն են։ Հայաստանի սեպտեմբեր և հոկտեմբերի ամիսների ֆինանսական վիճակագրությունը որևէ նշան ցույց չի տալիս, որ դրամը պետք է նվազի, իսկ երկարաժամկետ գործընթացները, որ ազդում են դրամի նվազեցման վրա, չկան։ Կան կարճաժամկետ գործընթացներ, որոնք արտաքին տնտեսական և ֆինանսական շոկերն են, դրանք արդեն նվազել են։ Օրինակ՝ նույն չինական յուանը էլի նվազել է դոլարի նկատմամբ, բայց հիմա որոշ չափով վերականգնում կա։ Ես ենթադրում եմ, որ մինչև տարվա վերջ դրամի փոխարժեքը կկայունանա, չեմ կարող վստահաբար ասել, թե արդյոք կվերադառնա այն 386-387 դրամին դոլարի նկատմամբ, որը կար վերջին տարվա ընթացքում, բայց գոնե 390-ի մոտակայքում հավանաբար կկայունանա»,- նշեց տնտեսագետը։
Մանրամասները՝ տեսանյութում։
