21.12.2025 | 22:02
Ֆուտզալի Հայաստանի հավաքականը հաղթեց Մոլդովային
28 վարորդ ուզում է վերադառնալ աշխատանքի․ քաղաքապետարանը դեռ ուսումնասիրում է դիմումները
Հասարակություն
06.12.2024 | 17:33
«Երևանի ավտոբուս» ՓԲԸ-ի ազատված 32 վարորդներից 28-ը դիմումներ են գրել, որպեսզի վերականագնեն աշխատանքը։ Այս մասին Factor.am-ի հարցմանն ի պատասխան ասաց Երևանի քաղաքապետի մամուլի քարտուղար Հայկ Կոստանյանը։
Այս պահին, ըստ Կոստանյանի, որևէ մեկը չի վերականգնել աշխատանքը։
«Բոլոր դիմումներն ուսումնասիրվելու են, ըստ այդմ՝ որոշումներ կայացվեն»,- նշեց Հայկ Կոստանյանը։
Հիշեցնենք՝ դեկտեմբերի 3-ին վարարդները գործադուլ էին հայտարարել՝ պահանջելով բարձրացնել աշխատավարձերը և դժգոհելով աշխատանքային պայմաններից։ Քաղաքային իշխանությունը շանտաժ որակեց վարորդների բողոքի արտահայտումը և հայտարարեց՝ որևէ կոմպրոմիսի չեն գնալու։ Նույն օրը փոխքաղաքապետ Սուրեն Գրիգորյանը հանցագործության մասին հաղորդում ներկայացրեց Գլխավոր դատախազություն․ Դատախազությունն արդեն իսկ օրենքով սահմանված կարգով ընթացք է տվել փոխքաղաքապետի հաղորդմանը։ Գործադուլի օրը՝ երեկոյան վարորդները հանդիպել էին «Երևանի ավտոբուս» ՓԲԸ-ի տնօրեն Բեգլար Կիրակոսյանի հետո։ Տիգան Ավինյանն էլ տեղեկացրեց, որ 32 վարորդի են հեռացրել աշխատանքից՝ վստահեցնելով, որ դեկտեմբերի 4-ից հասարակական տրանսպորտի աշխատանքը կվերականգնվի։
Քաղաքապետի խոսնակ Հայկ Կոստանյանը բացատրել էր՝ վարորդների աշխատանքից ազատման հիմքն այն է, որ եթե աշխատողը կատարել է այնպիսի արարք, որի հետևանքով գործատուն կրել է կամ կարող է կրել նյութական վնաս, գործատուն իրավունք ունի լուծելու աշխատանքային պայմանագիրը։ Մինչ այս հայտարարությունը վարորդները Factor TV-ին պատմել էին, որ երբ ասել են՝ գործադուլ կանենք, պատասխան է հնչել՝ ազատման դիմում գրեք: Փաստաբաններն ապօրինի են համարում գործադուլ հայտարարած վարորդներին աշխատանքից ազատելը։ Ո՛չ քաղաքապետ Տիգրան Ավինյանը, ո՛չ էլ քաղաքապետարանի մյուս պաշտոնյաները այդպես էլ հստակ բացատրություն չեն տվել՝ գործադուլ անող շուրջ 100 վարորդներից ինչ սկզբունքով են ընտրել հենց 32-ին։
Արփի Հակոբյան
