15.02.2026 | 17:00
Վենեսուելայում գործողության ժամանակ ԱՄՆ-ն օգտագործել է Claude չաթբոտը. WSJ
Վարչապետը հնարավորություն կստանա համայնքապետեր նշանակելու ճգնաժամային իրավիճակներում․ նախագիծն ընդունվեց
Քաղաքականություն
05.12.2024 | 20:21
Հայաստանում տեղական համայնքների ղեկավարների ժամանակավոր պաշտոնակատարներ նշանակելու իրավունք կունենան վարչապետն ու մարզպետները։ Ընտրական օրենսգրքում փոփոխություններ և լրացումներ կատարելու մասին օրինագծերի փաթեթն այսօր ընդունվեց Ազգային ժողովի արտահերթ նիստում երկրորդ ընթերցմամբ և ամբողջությամբ։ Այն քննարկվեց 24-ժամյա ռեժիմով։
Օրենսդրական նախաձեռնության համահեղինակ, ԱԺ պետական իրավական հարցերի մշտական հանձնաժողովի նախագահ, իշխող «Քաղաքացիական պայմանագիր» կուսակցության պատգամավոր Վլադիմիր Վարդանյանի խոսքով, օրենսդրական նախաձեռնության հեղինակներն այս նախագիծը մշակել են՝ ելնելով Գյումրիում տիրող իրավիճակից։
«Ավագանու լիազորությունների վաղաժամկետ դադարեցման դեպքում, եթե քաղաքապետարանի ղեկավարի պաշտոնը թափուր է, և միևնույն ժամանակ փոխքաղաքապետի պաշտոնը թափուր է, վարչապետին հնարավորություն կտրվի նշանակել համայնքապետի ժամանակավոր պաշտոնակատար, իսկ մարզպետը նույնը կարող է անել գյուղական համայնքներում։ Գոնե մինչև նոր ընտրությունների անցկացում»,- պարզաբանեց Վարդանյանը։
Նախագիծը քննարկման ժամանակ արժանացավ խորհրդարանական ընդդիմության կոշտ քննադատությանը։
«Հայաստան» խմբակցության պատգամավոր Արմենուհի Կյուրեղյանը հիշեցրեց Վանաձորի դեպքը․
«Վանաձորում գործող իշխանության թեթև ձեռքով արդեն 3,5 տարի է, ինչ քաղաքապետի պաշտոնակատարն այս պաշտոնում է։ Ի՞նչն է խանգարում, որ այս պատմությունը կրկնեք այլ համայնքներում»,- նշեց ընդդիմադիր պատգամավորը։
Նախագիծն ընդունվեց 61 կողմ և 21 դեմ ձայներով։
