Ով ուտի, ով հաշիվը փակի. թաղապետարանի կորպորատիվ` հարկատուի գրպանից․ ՏԵՍԱՆՅՈՒԹ 

Սառը խորտիկներ, խորոված թառափ, առնվազն 10 տարվա հնության կոնյակ․ Աջափնյակի թաղապետարանի աշխատակիցների ամանորյա կորպորատիվը շուրջ երկու միլիոն դրամ կարժենա։ Գումարը կվճարվի համայնքային բյուջեից։ Քաղաքապետարանի հայտարարած մրցույթում հաղթել է «ՍՓՈՐԹ ՍԵՐՎԻՍ» ՍՊԸ-ն՝ 1 միլիոն 998 հազար դրամով:

Բացի այս ընկերությունից՝ էլեկտրոնային աճուրդին մասնակցել է նաև 2024-ի հունիսին հիմնադրված «Գարանտ 24» ՍՊԸ-ն։ Բայց, ի տարբերություն «ՍՓՈՐԹ ՍԵՐՎԻՍ»-ի, այս ընկերությունն անհավանական բարձր գին է առաջարկել՝ 456 մլն դրամ։ Եվ սա այն դեպքում, երբ միջոցառման համար նախատեսված բյուջեն 2 միլիոն դրամ է: 

Factor TV-ն ուսումնասիրել է Աջափնյակի թաղապետարանի աշխատակիցների համար ամանորյա միջոցառման կազմակերպման պայամանագրի տեխնիկական բնութագիրը, պարզվում է՝ հյուրասիրությունը կազմակերպվում է 110 հոգու համար։

Իսկ ի՞նչ է մատուցվելու հյուրերին: Ըստ տեխբնութագրի՝ բարձրակարգ ռեստորանում առաջարկվելու են բազմապիսի նախուտեստներ, խորտիկներ, տաք ուտեստներ, բարձրակարգ խմիչքներ ու թարմ մրգեր: Հանդիսության անցկացման վայրն ընտրվելու է Աջափնյակ վարչական շրջանի կամ Երևան քաղաքից դեպի Արագածոտնի մարզ մինչև 5 կմ հեռավորության վրա բարձրակարգ ռեստորաններից մեկում։

Ճաշացանկը հետևյալն է․

• Նախուտեստ` խոշոր սև և կանաչ ձիթապտուղ, 

• կիտրոն, 

• առնվազն 4 տեսակի պանիր, 

• լոլիկ, 

• վարունգ, 

•  քաղցր, կծու պղպեղ                              

• խառը կանաչի, 

• քամած մածուն,

• ռեժան, 

• թթու, 

• Սառը խորտիկներ՝ ապխտած երշիկ, 

• ֆիլե, 

• բաստուրմա, 

• սուջուխ, 

• ռուլետ, 

• պաշինա, 

• ձկան տեսականի, 

• մայրաքաղաքային, ցեզար, փաթաթած սմբուկ, տավարի մսով և սալորաչրով աղցաններ, 

• Տաք ուտեստներից՝ խոզի, հորթի, գառան խորոված

• տապակած կարտոֆիլ, 

• խորոված թառափ, 

• ուզբեկական փլավ,

• հացի տեսականի, լավաշ, 

• Խմիչքներից՝ բարձր կարգի, առնվազն 10 տարվա պահպանման, 0.7լ գործարանային, շշալցված կոնյակ, 

• բարձր կարգի ալֆա սպիրտից 0.7լ գործարանային, շշալցված օղի,

• կարմիր և սպիտակ կիսաչոր, բարձր կարգի գինի, 

• զովացուցիչ ըմպելիքներ, 

• բնական հյութեր, 

• 1լ բարձրորակ կոմպոտներ, 

• գազավորված ըմպելիք, 

• բարձրորակ՝ 0.5լ գործարանային, շշալցված հանքային ջրեր, 

• մրգերից՝ նարինջ, մանդարին, խնձոր, բանան, թուրինջ, կիվի, 

• աղացած, լուծվող սուրճ, 

• սև և կանաչ թեյ։

Ըստ տեխնիկական բնութագրի՝ սրահը պետք է հագեցած լինի օդափոխության և լուսաձայնային համակարգերով։ Փորձառու հանդիսավար ու դիջեյ էլ է պահանջվում, սպասարկող տեխանձնակազմով համապատասխան ձայնային տեխնիկան ևս պարտադիր է։

Այս միջոցառմանը պիտի մասնակցեր Աջափնյակ վարչական շրջանի արդեն նախկին ղեկավար Կամսար Բաբինյանը, քանի որ մրցույթը նրա օրոք է հայտարարվել։ Բայց նա նոյեմբերի 8-ին հրաժարականի դիմում ներկայացրեց, և վարչական շրջանի ղեկավար նշանակվեց նախկին փոխթաղապետ Սերոբ Սարգսյանը: 

Մանրամասները՝ տեսանյութում։

Արփի Հակոբյան