14.09.2026 | 23:23
Պապիկյանի գլխավորած պատվիրակությունն աշխատանքային այցով մեկնել է Չինաստան
Գիշերային բախումներ Թբիլիսիում․հատուկջոկատայինները բերման են ենթարկել ցուցարարներին․ ՏԵՍԱՆՅՈՒԹ
Քաղաքականություն
02.12.2024 | 10:05
Վրաստանում արդեն չորրորդ գիշերն անընդմեջ բախումներ են տեղի ունենում ցուցարարների և ոստիկանների միջև։ Իշխանության արտաքին քաղաքականությունից դժգոհ հազարավոր մարդիկ դուրս են եկել փողոց․ ակտիվիստները բարիկադներ են կառուցել, պիրոտեխնիկա կիրառել, որին ի պատասխան ոստիկանները արցունքաբեր գազ և ջրցան մեքենաներ են օգտագործել, գրում է Sky news-ը։
Կիրակի երեկոյան մարդիկ կրկին դուրս էին եկել Ռուսթավելիի կենտրոնական պողոտա՝ ոմանք հակագազերով, մյուսները՝ Վրաստանի և ԵՄ դրոշներով։
Վրաստանի ՆԳՆ հատուկջոկատայինները դուրս են մղել ցուցարարներին խորհրդարանի շենքին հարող հատվածից և սկսել են ձերբակալել բողոքի ակցիայի մասնակիցներին, հաղորդում է ՏԱՍՍ-ը։ Իրավապահները արցունքաբեր գազ են կիրառել։
Գիշերային բախումների մի խումբ մասնակիցների իրավապահները հետապնդել են և բերման ենթարկել առավոտյան։
Ավելի վաղ Վրաստանի ՆԳՆ-ն հայտնել էր, որ երկրի խորհրդարանի դիմաց տեղի ունեցած անկարգությունների ժամանակ ցուցարարները ոստիկանների ուղղությամբ նետել են քարեր, հրկիզող նյութեր, շշեր ու մետաղական առարկաներ, ինչպես նաև օգտագործել են պիրոտեխնիկա։
Բողոքի նոր ալիքը Վրաստանում սկսվել է նոյեմբերի 28-ին այն բանից հետո, երբ «Վրացական երազանքը» որոշում ընդունեց Եվրամիությանն անդամակցելու շուրջ քննարկումների մեկնարկը առնվազն մինչև 2028 թվականի վերջ հետաձգել։ Բողոքի ցույցերի առաջին երեք օրվա ընթացքում բերման է ենթարկվել մոտ 200 մարդ։ Դեկտեմբերի 1-ի գիշերը հոսպիտալացվել է առնվազն 44 մարդ, այդ թվում՝ 27 ցուցարար, 16 ոստիկան և 1 լրագրող։
Թարգմանությունը՝ Տաթև Ֆռանգյանի
