Ռոբերտ Քոչարյանի նոր մեղադրանքով վերագրվող արարքի վաղեմության ժամկետն անցած է

Հանրային մեղադրողներ Հայկ Հովհաննիսյանն ու Արմեն Գևորգյանն այսօր ներկայացրին Հայաստանի երկրորդ նախագահ Ռոբերտ Քոչարյանի և ՀԱՊԿ նախկին գլխավոր քարտուղար Յուրի Խաչատուրովի մեղադրանքները, համաձայն որի՝ Քոչարյանին ու Խաչատուրովին վերագրվում է Քրեական նախկին օրենսգրքի 309-րդ հոդվածի 3-րդ մասով, որը համապատասխանում է գործող օրեսնգրքի 441-րդ հոդվածի 2-րդ մասի 5-րդ կետին։

Խոսքը պաշտոնեական լիազորություններն անցնելու մասին է, որն անզգուշությամբ առաջացրել է ծանր հետևանք։ Ենթադրվում է, որ հաջորդ դատական նիստին մյուս երկու մեղադրյալին՝ Սեյրան Օհանյանին և Արմեն Գևորգյանին ևս նույն հոդվածով մեղադրանքներ կառաջադրվեն,սակայն ուշագրավ է, որ այս հոդվածով մեղադրանքի պայմաններում գործով անցնող 4 անձանցից որևէ մեկը պատասխանատվության չի ենթարկվի։

Մասնավորապես՝ Քրեական դատավարության օրենսգրքի 12-րդ հոդվածով սահմանվում է, որ քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե անձը Հայաuտանի Հանրապետության քրեական oրենuգրքի ընդհանուր կամ հատուկ մասի դրույթների ուժով ենթակա է ազատման քրեական պատաuխանատվությունից։ Քրեական օրենսգրքի ընդհանուր մասում ընդգրկված 83-րդ հոդվածով էլ սահմանվում է, որ վաղեմության ժամկետն անցած լինելը քրեական պատասխանատվությունից ազատվելու հիմք է։

Քրեական օրենսգրքի 441-րդ հոդվածի 2-րդ մասով սահմանվում է պատիժ 4-ից 8 տարի ժամկետով։ Նույն օրենսգրքով սահմանվում է նաև, որ արարքը համարվում է ծանր հանցագործություն, եթե դրա համար սահմանված առավելագույն պատիժը չի գերազանցում 10 տարին, այսինքն՝ 441-րդ հոդվածը 2-րդ մասով սահմավող արարքը ծանր հանցագործություն է, իսկ ծանր հանցագործությունների վաղեմության ժամկետը նոր Քրեական օրենսգրքում 15 տարի է։

Քոչարյանին և մյուսներին վերագրվող ենթադրյալ հանցավոր արարքները տեղի են ունեցել 2008 թվականին, այսինքն՝ ավելի, քան 16 տարի առաջ, ուստի՝ անցել է Քոչարյանին և մյուսներին քրեական պատասխանատվության ենթարկվելու վաղեմության ժամկետը։

Factor TV-ի հարցին՝ հնարավո՞ր է Քոչարյանը համաձայնի, որ իր նկատմամբ վաղեմության ժամկետն անցած լինելու հիմքով քրեական հետապնդումը դադարեցվի, Քոչարյանը հստակ պատասխան չտվեց՝ նշելով, որ չգիտի, դեռևս պետք է ծանոթանա գործի նյութերին։

Արաքս Մամուլյան