Նոր մեղադրանք՝ Քոչարյանին և Խաչատուրովին

Հայաստանի երկրորդ նախագահ Ռոբերտ Քոչարյանի և մյուսների գործով դատական նիստի ընթացքում հանրային մեղադրող Հայկ Հովհաննիսյանը Քոչարյանի և ՀԱՊԿ նախկին գլխավոր քարտուղար Յուրի Խաչատուրովի արարքի իրավական գնահատականը փոխեց և նրանց նոր մեղադրանք ներկայացրեց:

Ըստ մեղադրողի` Քոչարյանին և Խաչատուրովին վերագրվող արարքը պարունակում է Քրեական նախկին օրենսգրքի 309-րդ հոդվածի 3-րդ մասի հանցակազմի տարրեր, այսինքն` պաշտոնեական լիազորություններն անցնելը, որն անզգուշությամբ առաջացրել է ծանր հետևանքներ: Այս արարքն, ըստ մեղադրողի, համապատասխանում է Քրեական գործող օրենսգրքի 441-րդ հոդվածի 2-րդ մասի 5-րդ կետին:

Այսօրվա նիստի ընթացքում գործով մյուս 2 անձանց` Սեյրան Օհանյանին և Արմեն Գևորգյանին մեղադրանք չներկայացվեց, քանի որ նիստը հետաձգվեց, սակայն, ենթադրվում է, որ նրանց ևս նույն հոդվածով կներկայացվի մեղադրանք:

Հիշեցնենք, որ Քոչարյանին, Խաչատուրովին, Օհանյանին և Գևորգյանին վերագրվում էր սահմանադրական կարգի տապալման հոդված, սակայն Սահմանադրական դատարանն այս հոդվածը հակասահմանադրական է ճանաչել, ապա մեկ այլ որոշմամբ դիրքորոշում հայտնել, որ այն դեպքում, երբ անձին վերագրվող արարքը սահմանող հոդվածը հակասահմանադրական է ճանաչվում, դատախազներն իրավունք ունեն վերաորակելու արարքը:

ՍԴ այս որոշումից հետո Վճռաբեկ դատարանը բեկանել է սահմանադրական կարգի տապալման հոդվածով 4 մեղադրյալի նկատմամբ քրեական հետապնդումը դադարեցնելու, քրեական գործի վարույթը կարճելու որոշումն ու գործն ուղարկել նոր քննության։

Արաքս Մամուլյան