Մոսկվայի քաղաքապետարանն՝ ընդդեմ Լևոն Քոչարյանի․ Արբիտրաժային դատարանը սնանկության գործ է քննում

Մոսկվայի քաղաքապետարանը դիմել է Արբիտրաժային դատարան՝ պահանջելով  սնանկ ճանաչել ՀՀ երկրորդ նախագահ Ռոբերտ Քոչարյանի որդուն՝ Ազգային ժողովի «Հայաստան» խմբակցության պատգամավոր Լևոն Քոչարյանին պատկանող «Զեմկոմինվեստ» ՍՊ ընկերությունը։

«Զեմկոմինվեստ»-ը 2024 թ-ի սեպտեմբերի դրությամբ Մոսկվայի քաղաքապետարանին պարտք է 2 մլն 65 հազար ՌԴ ռուբլի (մոտ 21 հազար 300 ԱՄՆ դոլար կամ 8.2 մլն ՀՀ դրամ)՝ հողի վարձակալության համար։ Գործը դատարան է ընդունվել 2024 թ-ի օգոստոսի 15-ին, հոկտեմբերի 22-ին կայացել է նախաքննությունը։ Դատարանի հաջորդ նիստը նշանակված է դեկտեմբերի 12-ին։ Նկատենք, որ նախորդ տարիներին ևս Մոսկվայի քաղաքապետարանը պարտքի պահանջի նմանատիպ հայցերով այս նույն ընկերության դեմ դիմել է Արբիտրաժային դատարան և հիմնականում հաղթել դատերը։

«Զեմկոմինվեստ» ընկերությունը ստեղծվել է 2007 թ-ին, զբաղվում է անշարժ գույքի վարձակալությամբ, կառավարմամբ, վաճառքով, նաև տրանսպորտային փոխադրումներով։ 2023 թ-ին ընկերության եկամուտը կազմել է 21 մլն ռուբլի, վնասը՝ 13 մլն ռուբլի։

Լևոն Քոչարյանը ՌԴ-ում գործող այս ընկերության 50 %-ի բաժնետերն է։

 Ընկերության մնացած 50%-ի սեփականատերը ռուսական «Օրիոն» ՓԲԸ-ն է, որը զբաղվում է կառուցապատմամբ։ Դրա հիմնադիրը Դավիթ Գենադիի Ստեփանյանն է։ Գենադի Ստեփանյանը ՀՀ նախկին դատախազ է, Քոչարյանի քավորն է, երկար տարիներ բիզնեսով է զբաղվում Ռուսաստանում, որտեղ մի քանի ընկերություններ է հիմնադրել, այդ թվում՝ «Ստինկոմ» ԲԲԸ-ն և «Երևան պլազա» առևտրի կենտրոնը (Սամվել Կարապետյանի «Տաշիր Գրուպի» հետ համատեղ)։ Ստեփանյանները Երևանի Հյուսիսային պողոտայում բնակարան ունեն և գրանցված են այդ հասցեում։ Այս տարվա հոկտեմբերի սկզբին Դվին հյուրանոցում տեղ է ունեցել Գենադի Ստեփանյանի մյուս որդու՝ Շագոր Ստեփանյանի հարսանիքը: Ի դեպ, զույգերին եկեղեցում օրհնել է Ամենայն հայոց կաթողիկոսը ։

Հավելենք, որ 2020 թ-ին Ռոբերտ Քոչարյանի ազատության համար 2 միլիարդ դրամ գրավ վճարելու համար աջակցողներից մեկը եղել է Գենադի Ստեփանյանը։ 

Գենադի Ստեփանյանի որդին՝ Շագոր Ստեփանյանը՝ Ռոբերտ Քոչարյանի հետ

Գայանե Խաչատրյան