Միջազգային քրեական դատարանը Նեթանյահուին ու Իսրայելի նախկին պաշտպանության նախարարին կալանավորելու օրդեր է տվել

ՄԱԿ-ի Միջազգային քրեական դատարանը Իսրայելի վարչապետ Բենիամին Նեթանյահուին,  պաշտպանության նախկին նախարար Յոավ Գալանտին  և ՀԱՄԱՍ-ի մի շարք ներկայացուցիչների՝ այդ թվում ռազմական ղեկավար Մուհամեդ Դեյֆին կալանավորելու օրդեր է տվել՝  մեղավոր ճանաչելով ռազմական հանցագործությունների և մարդկության դեմ կատարած հանցագործությունների մեջ՝ կապված Գազայի պատերազմի և 2023 թվականի հոկտեմբերի հարձակումների հետ, գրում է AP-ն։

Լրատվամիջոցն ընդգծում է, որ այս որոշումը Նեթանյահուին և մյուսներին վերածում է միջազգային հետախուզման մեջ գտնվող կասկածյալների և, ամենայն հավանականությամբ, ավելի կմեկուսացնի նրանց և կբարդացնի 13-ամիս ձգվող հակամարտությունը դադարեցնելու շուրջ բանակցությունները: Սակայն դրա գործնական հետևանքները կարող են սահմանափակ լինել, քանի որ Իսրայելը և նրա գլխավոր դաշնակիցը՝ Միացյալ Նահանգները, դատարանի անդամ չեն, իսկ ՀԱՄԱՍ-ի մի քանի պաշտոնյաներ արդեն սպանվել են հակամարտության ընթացքում:

«Պալատը համարում է, որ կան ողջամիտ հիմքեր ենթադրելու, որ անհատները միտումնավոր և գիտակցաբար զրկել են Գազայի խաղաղ բնակչությանը նրանց գոյատևման համար անհրաժեշտ պայմաններից, այդ թվում՝ սննդից, ջրից, դեղորայքից և բժշկական պարագաներից, ինչպես նաև վառելիքից և էլեկտրաէներգիայից»,- գրել է  երեք դատավորներից կազմված կոլեգիան իր միաձայն որոշման մեջ Նեթանյահուի և նրա պաշտպանության նախկին նախարար Յոավ Գալանտի նկատմամբ օրդեր տրամադրելու մասին:

Իսրայելի ԱԳՆ-ն սեպտեմբերին հայտարարել էր, որ ներկայացրել է երկու իրավական փաստաթղթեր, որոնք վիճարկում են ՄՔԴ-ի իրավասությունը և պնդում, որ դատարանը Իսրայելին հնարավորություն չի տվել հետաքննել մեղադրանքները նախքան օրդերներ խնդրելը:

Թարգմանությունը՝ Էմմա Չոբանյանի