14.09.2026 | 23:23
Պապիկյանի գլխավորած պատվիրակությունն աշխատանքային այցով մեկնել է Չինաստան
Եթե վարչության որոշում լինի՝ կմտածեմ․ Հովիկ Աղազարյանը՝ մանդատը վայր դնելու մասին
Քաղաքականություն
20.11.2024 | 12:42
Factor.am-ը երեկ հայտնել էր, որ մեր տեղեկություններով երեկ երեկոյան ՔՊ վարչության նիստում որոշվել է, որ խմբակցության պատգամավոր Հովիկ Աղազարյանը մանդատը վայր կդնի: Առավոտյան Factor.am-ը պատգամավորից հետաքրքրվեց՝ ինչ որոշում ունի, մանդատը վայր դնո՞ւմ է։
«Ինչո՞ւ պետք է դա անեմ»,- տարակուսեց իշխանական պատգամավորը։ Հարցրինք՝ արդյո՞ք ՔՊ վարչությունը նման որոշում է կայացրել, եթե այո՝ չի՞ կատարելու որոշումը։
«Եթե վարչության որոշումը լինի, այն ժամանակ էլ կմտածեմ։ Եթե որոշում չկա, ուրեմն, պատասխան էլ չկա»,- արձագանքեց Հովիկ Աղազարյանը՝ պնդելով՝ տեղյակ չէ, որ վարչությունն իրեն մանդատից զրկելու որոշում է կայացրել։
Հովիկ Աղազարյանին հիշեցրինք՝ ՔՊ վարչության տարածած տեսանյութում երևում է, որ նիստին նաև ինքն է մասնակցում։ Նա տեղեկացրեց, որ մասնակցել է նիստին՝ պատասխանել է հայտնի միջադեպի հետ կապված հարցերին և դուրս եկել։
Պատգամավորը որպես վկա օրերս նաև հրավիրվել էր Հակակոռուպցիոն կոմիտե հարցաքննության մեկ այլ գործով։
ԱԺ-ից Factor.am-ին հայտնեցին, որ Հովիկ Աղազարյանից մանդատ վայր դնելու վերաբերյալ դիմում չեն ստացել։
Հիշեցնենք՝ երեկ մանդատը վայր դրեց ՔՊ խմբակցության պատգամավոր Նարեկ Զեյնալյանը: Factor.am-ի տեղեկություններով՝ պատճառը վերջերս ԱԺ-ում տեղի ունեցած լեզվակռիվն էր արդեն ՔԿ նախկին պետ Արգիշտի Քյարամյանի մասնակցությամբ, որի մասնակից էին նաև Աղազարյանն ու Զեյնալյանը:
Մանյա Պողոսյան
