Թրամփը ՀՀ-ին աջակցող բանաձևերը սատարած Մարկ Ռուբիոյին կնշանակի պետքարտուղարի պաշտոնում

Ակնկալվում է, որ ԱՄՆ նորընտիր նախագահ Դոնալդ Թրամփը պետքարտուղարի պաշտոնում կնշանակի Ֆլորիդայից սենատոր Մարկո Ռուբիոյին։ Այս մասին The New York Times-ին հայտնել են իրավիճակին ծանոթ երեք աղբյուրներ։

Նշվում է, որ Թրամփը վերջին պահին դեռ կարող է փոխել միտքը, սակայն, ըստ երևույթին, կանգ է առել Ռուբիոյի թեկնածության վրա, որին դիտարկել է նաև որպես իր փոխնախագահի թեկնածու։

Մարկ Ռուբիոն Սենատի անդամ է ընտրվել 2010 թվականին և արտաքին քաղաքականության հարցերում կոշտ դիրքորոշումներ է ընդունել, հատկապես՝ Չինաստանի, Իրանի, Վենեսուելայի և Կուբայի նկատմամբ:

Ըստ պարբերականի՝ չնայած նախկիում ՌԴ-ի նկատմամբ կոշտ դիրքորոշմանը՝ նա, ամենայն հավանականությամբ, կհամապատասխանի Թրամփի կողմից ակնկալվող ծրագրերին՝ ճնշում գործադրել Ուկրաինայի վրա՝ Ռուսաստանի հետ համաձայնության գալու և ՆԱՏՕ-ից դուրս մնալու համար:

Ռուբիոն եղել է Չինաստանի նկատմամբ Վաշինգտոնի ավելի ագրեսիվ  քաղաքականության կողմնակից սենատորներից։ 2019 թվականին նա օգնել է Թրամփին համոզել Վենեսուելայի դեմ կոշտ պատժամիջոցների քաղաքականություն որդեգրել՝ փորձելով պաշտոնանկ անել ավտորիտար նախագահ Նիկոլաս Մադուրոյին: Իսկ վերջերս նա աջակցություն է հայտնել Գազայում Իսրայելի պատերազմին:

Հարկ է նկատել, որ Մարկ Ռուբիոն քաջատեղյակ է նաև Հայաստան-Ադրբեջան հարաբերություններին։ 2022 թվականի սեպտեմբերին Ադրբեջանի կողմից ՀՀ ներխուժումից և Հայաստանի ինքնիշխան տարածքներն օկուպացնելուց հետո, ԱՄՆ Սենատի արտաքին հարաբերությունների հանձնաժողովի նախագահ Բոբ Մենենդեսը և Մարկ Ռուբիոն ներկայացրել էին երկկուսակցական օրենսդրական ակտ, որը դատապարտում էր Ադրբեջանի չհրահրված հարձակումը Հայաստանի վրա։

Ռուբիոն աջակցել է նաև 2023 թվականի նոյեմբերին ԱՄՆ Սենատի կողմից Հայաստանի պաշտպանության ակտի ընդունմանը։

«ԱՄՆ-ի հարկատուների դոլարները չպետք է ուղղվեն դեպի Ադրբեջան, մի ժողովրդի, որը տարածաշրջանում անկայունություն է բերել։ Սենատի իմ գործընկերները համաձայն են, և մենք միասին ընդունեցինք Հայաստանի պաշտպանության ակտը: Ներկայացուցիչների պալատի իմ գործընկերներին կոչ եմ անուն նույնն անել»,- գրել էր Ռուբիոն X- ի իր միկրոբլոգում։

Նա նաև հայտնի է Ադրբեջանում քաղբանտարկյալների խնդրի վրա ուշադրություն հրավիրելու արշավով: 2017 թվականին Ռուբիոն նամակ է հղել նախագահ Իլհամ Ալիևին երկրում լրագրողների նկատմամբ քաղաքական հետապնդումների վերաբերյալ։ Վերջերս էլ նա ակտիվորեն քննադատում էր Ադրբեջանի իշխանություններին հայտնի տնտեսագետ ու ընդդիմադիր գործիչ Գուբադ Իբադօղլուի  կալանավորման համար։

Էմմա Չոբանյան