Նոր զարգացում Քյարամյանի հետ կապված․ նրա պահվածքը քննվում է ՔԿ կարգապահական հանձնաժողովում

Factor.am-ի տեղեկություններով Ազգային ժողովում Քննչական կոմիտեի նախագահ Արգիշտի Քյարամյանի պահվածքի վերաբերյալ ՔԿ կարգապահական հանձնաժողովում քննարկում է սկսվել։ Այս տեղեկությունը մեր հարցին ի պատասխան հաստատեց նաև ՔԿ նախագահի մամուլի խոսնակ Գոռ Աբրահամյանը։

«Կա ստացված դիմում, որը ՀՀ ՔԿ կարգապահական հանձնաժողովում քննարկման փուլում է։ Այլ տվյալներ հրապարակման ենթակա չեն»,- Factor.am-ի հետ զրույցում ասաց նա՝ չհստակեցնելով, թե դիմումն ում կողմից է ստացվել։

Հիշեցնենք՝ հոկտեմբերի 15–ին խորհրդարանական լսումների ժամանակ վիճաբանություն էր ծավալվել ԱԺ ՔՊ-ական պատգամավոր Հովիկ Աղազարյանի և Արգիշտի Քյարամյանի միջև։ Ամեն ինչ սկսվել էր Քյարամյանի հայտարարություններից, որտեղ նա դիմելով ԱԺ դահլիճում գտնվող անձանցից մեկին ասաց.- «Բան ասեցի՞ք։ Այդ սև շորերով պատգամավորը»,-որի ինքնությունն այդպես էլ չբացահայտվեց։

Վեճը վերաճեց լեզվակռվի, և կողմերն անցան փողոցային բառապաշարի։ ՔԿ նախագահը ՔՊ-ական պատգամավորին հարց ուղղեց, թե ինչո՞ւ են պատգամավորի որդուն առնչվող գործի համար իրեն միջնորդում։

Այդ օրը հանրությունն ականատես եղավ էլ ամբիոնից մատ տնկելու, էլ զայրացած խոսափողին խփելու, էլ «արա»-ով իրար հետ խոսելու։ 34-ամյա Քյարամյանը 64-ամյա Աղազարյանին պատասխանեց՝ «ոտքից գլուխ ես արան»։

Արդյունքում Ազգային ժողովի դահլիճում ներկաները ստիպված էին բաժանել իրար վրա բորբոքված գոռգոռացող Քննչական կոմիտեի նախագահին ու իշխանական պատգամավորին։

Հիշեցնենք, որ ՀՀ հակակոռուպցիոն կոմիտեում Քյարամյանի հայտարարությունների վերաբերյալ, թե Աղազարյանի որդու գործով միջնորդություն է եղել, քրեական վարույթ է նախաձեռնվել ՀՀ քրեական օրենսգրքի 486–րդ հոդվածի առաջին մասով (երկու դրվագ), որոնք չեն բացահայտվում։

Ի դեպ, այս վարույթն էլ նախաձեռնվել է Գլխավոր դատախազության հանձնարարությունից հետո, մինչ այդ Սասուն Խաչատրյանի ղեկավարած կառույցում որոշել էին, որ վարույթի հիմքեր չկան։

Արգիշտի Քյարամյանը երեկ խորհրդարանում՝ աղմկահարույց միջադեպից 15 օր անց ափոփսանք հայտնեց։ «Ուզում եմ ափսոսանք հայտնել Ազգային ժողովում տեղի ունեցած միջադեպի համար»,-ասաց Քյարամյանը և միայն Factor.am-ի հարցապնդումներից հետո հայտարարեց, որ պատրաստ է ներողություն խնդրել․ «Եթե հանրությունը ընդհանուր խնդիր է տեսնում, և վստահ եմ, որ տեսել է, իհարկե, դա իմ համար բացարձակ խնդիր չի, իհարկե, պատրաստ եմ ներողություն խնդրել հանրությունից»,-ասաց նա՝ այդպես էլ ուղիղ չասելով, որ ներողություն է խնդրում։

Ինչ վերաբերում է ՔԿ կարգապահական հանձնաժողովին, որը քննում է Քյարամյանի հարցը, ապա նշենք, որ այն բաղկացած է 8 անդամից։ Նախագահը Քյարամյանի տեղակալ Արսեն Այվազյանն է, կազմում են՝ երեք անձ ՔԿ-ից, երկու անձ վարչապետի աշխատակազմից և ՆԳ նախարարի տեղակալ Արփինե Սարգսյանը։ Մեկ տեղն, ըստ ՔԿ կայքի, թափուր է։ Թե ի՞նչ որոշում կկայացնի հանձնաժողովը, որի կազմը հիմնականում բաղկացած է կոմիտեի ներկայացուցիչներից, ժամանակը ցույց կտա։

Նարեկ Կիրակոսյան