ԱՄՆ-ը չի բացառում հետագա հետևանքները, եթե Վրաստանի կառավարությունը չփոխի իր քաղաքականությունը

«Մենք չենք բացառում հետագա հետևանքները, եթե Վրաստանի կառավարության կուրսը չփոխվի»,- այս մասին հրավիրված ճեպազրույցում ասել է ԱՄՆ Պետքարտուղարության խոսնակ Մեթյու Միլլերը։

Նրա խոսքով՝ «վրաց ժողովուրդը շաբաթ օրը քվեարկության է գնացել մի մթնոլորտում, որը ձևավորվել է իշխող կուսակցության քաղաքականությամբ, ներառյալ՝ պետական ռեսուրսների չարաշահումը, ձայների գնումը և ընտրողներին ահաբեկումը», ինչն էլ ստեղծել է «անհավասար պայմաններ» և խաթարել «հասարակական և միջազգային վստահությունը» գործընթացի հանդեպ։

«Մենք միանում ենք միջազգային և տեղական դիտորդների կոչերին ընտրությունների հետ կապված խախտումների վերաբերյալ բոլոր հաղորդումների ամբողջական հետաքննության վերաբերյալ ու կոչ ենք անում հարգել խոսքի և խաղաղ հավաքներ անցկացնելու հիմնարար ազատությունները: Մենք կոչ ենք անում վրաց իշխանություններին մտածել այն մասին, թե ինչպիսի հարաբերություններ են նրանք ցանկանում ունենալ եվրատլանտյան հանրության հետ, այլ ոչ թե ամրապնդել ավտոկրատների քաղաքականությունը»,- ասել է նա:

Ըստ Պետքարտուղարության պաշտոնյայի՝ «վրացիների ավելի քան 80%-ը ցանկանում է տեսնել իր երկիրը ԵՄ-ին և ՆԱՏՕ-ին ինտեգրված»:

«Վրաստանի Սահմանադրությունը, որն առաջարկվել և աջակցվել է ներկայիս իշխող կուսակցության կողմից, հանձնարարում է անդամակցել եվրատլանտյան ինստիտուտներին: Բոլոր կուսակցությունները քարոզարշավ են իրականացնում՝ ի պաշտպանություն այս նպատակի, սակայն իշխող կուսակցությունն այս կուրսին հակասող քայլեր է ձեռնարկել։ Վրաստանի կառավարությունը կարող է վերահաստատել իր հավատարմությունը ժողովրդավարական եվրաատլանտյան կուրսին` հարգելով օրենքի գերակայությունը, շտկելով ընտրական գործընթացի թերությունները, չեղյալ համարելով հակաժողովրդավարական օրենսդրությունը և զգալի ջանքեր գործադրելով ԵՄ-ին անդամակցելու համար առաջարկված բարեփոխումների իրականացման հարցում: Մենք այս տարի հետևողականորեն կոչ ենք արել Վրաստանի կառավարությանը հրաժարվել իր հակաժողովրդավարական գործողություններից և վերադառնալ եվրատլանտյան ուղի»,- նշել է նա։

Թարգմանությունը՝ Տաթև Ֆռանգյանի