Հաղորդաշարեր
26.10.2024 | 19:00«Ակադեմիական քաղաքի նախագծում տրանսպորտի հետ կապված, իհարկե, խնդիր կա: Ընդ որում, դա ոչ միայն երևանյան, այլև համահայաստանյան խնդիր է: Այդ ի՞նչ տրանսպորտ պետք է աշխատի,որ սովորողներին, մյուսներին արագ տանի-բերի Ակադեմիական քաղաք,սա խնդիր է: Ընդ որում, իրատեսական չեմ համարում, որ նախագիծը մինչև 2030 թվականը կյանքի կոչվի. մենք նման շինարարական հզորություն չունենք, անհնար է»,- Factor TV-ի հետ զրույցում տեսակետ է հայտնում ճարտարապետ Սաշուր Քալաշյանը` անդրադառնալով «Ակադեմիական քաղաք» նախագծին: Ի դեպ, օրեր առաջ վարչապետ Նիկոլ Փաշինյանը մի քանի համալսարանների պրոֆեսորադասախոսական կազմին, գիտահետազոտական կազմակերպություններին ներկայացրել էր ներկայացրել էր նախագծի տեխնոլոգիական կլաստերի նկարագիրը:
Սաշուր Քալաշյանը խոսում է նաև Երևանի Կասկադ համալիրի արդիականացման նախաձեռնությունից. «Էսքիզները տեսել եմ, չափազանցված ուռճացված են, դրանք ճնշող ազդեցություն են թողնում Կասկադի կերպարի վրա, այլ լուծում, մրցույթ հայտարարել է պետք: Բացի այդ` Կասկադի հեղինակներից մեկին` Ասլան Մխիթարյանին ինչո՞ւ չեն ներգրավում աշխատանքներում, կարծում եմ` անտեղյակ մարդիկ են դրանով զբաղվում»:
Սաշուր Քալաշյանի կարծիքով` Երևանում քաղաքաշինական, ճարտարապետական ոլորտների բացթողումները կապված են երկրի տնտեսական վատ վիճակի հետ. «Փող ունես`100 հարկանի շենք էլ կկառուցես, Երևանում միայն բիզնես շահն է գործում: Բիզնեսի մեծ աղբյուր է շինարարական ոլորտը: Թույլատրվում է ամեն ինչ, միայն թե փող շատ աշխատեն. սա ձեռնտու է թե´ թույլատրողին, թե´ ներդրողին, որը կարճ ժամանակում եկամուտ է ապահովում»:
Մանրամասները`տեսանյութում:
Աննա Բաբաջանյան
