Գյումրիի քաղաքապետարանը չի մեկնաբանում «Բալասանյան» դաշինքի մանդատները վայր դնելու մասին լուրերը

Գյումրիի քաղաքապետ Վարդգես Սամոսնյանի մամուլի խոսնակ Սոնա Առաքելյանը չի մեկնաբանում մամուլում շրջանառվող տեղեկությունը, ըստ որի՝ ավագանու իշխանական «Բալասանյան» դաշինքը, քաղաքապետի գլխավորությամբ, մանդատները վայր է դնելու՝ հրաժարվելով քաղաքի կառավարումից։

«Կներեք, շրջանառվող տեղեկությունները, որոնք հրապարկվում են, այս պահին չենք մեկնաբանում»,- Factor.am-ին ասաց մամուլի խոսնակը։

Նշենք, որ մի քանի օր է՝ լրատվամիջոցներում «Բալասանյան» դաշինքի անդամների և քաղաքապետի մանդատները վայր դնելու մասին լուրեր են շրջանառվում։

Հիշեցնենք, որ երեկ ԱԺ-Կառավարություն հարցուպատասխանի ժամանակ անդրադարձ է եղել Գյումրիի քաղաքային իշխանության կողմից մանդատները վայր դնելու մասին հարցին։

ԱԺ «Հայաստան» խմբակցության պատգամավոր Մհեր Մելքոնյանը վարչապետ Նիկոլ Փաշինյանին հարցրել էր Գյումրիում ծավալվող իրադարձությունների վերաբերյալ։ «Տևական ժամանակ բոլորի ուշադրության կենտրոնում Գյումրու շուրջ ծավալվող իրադարձություններն են: Չհամակերպվելով այն փաստի հետ, որ «Քաղաքացիական պայմանագիր»-ը չունի լիարժեք իշխանություն՝ այսօր իշխանական մեքենան լծվել է այդ փաստը շտկելու աշխատանքին: Օգտագործելով իշխանական ճնշում գործադրելու բոլոր անհնար ու հնարավոր մեթոդները՝ փորձում եք Ախուրյանի, Վանաձորի, Ալավերդու օրինակով իշխանությունը նվաճել նաև Գյումրիում: Ո՞րն է հաջորդ համայնքը»,- վարչապետից հետաքրքրվել էր Մելքոնյանը։

Պատգամավորի հարցին ի պատասխան Փաշինյանն ասել էր. «Կներեք, ի՞նչ է պատահել Գյումրիում, որ էդքան տեղեկացված եք, մեզ էլ ասեք՝ ինչ է կատարվելու Գյումրիում, մենք էլ իմանանք»:

Մհեր Մելքոնյանն էլ պատասխանել էր, որ Գյումրիում «Բալասանյան դաշինք»-ը հանձնելու է իշխանությունը, և, իր կարծիքով, ՔՊ-ն արտահերթ ընտրության է գնալու:

«Եղավ, շնորհակալություն»,- արձագանքել էր վարչապետը:

Հավելենք նաև, որ Նիկոլ Փաշինյանը հոկտեմբերի 18-ին այցելել էր  Գյումրի։ Նրա գլխավորությամբ ՔՊ կուսակցության Գյումրիի գրասենյակում աշխատանքային խմբի նիստ էր տեղի ունեցել։

Մանյա Պողոսյան